თბილისის სახელმწიფო უნივერსიტეტის რიგით 40-ე რექტორი გიორგი შარვაშიძე გახდა. იგი აცხადებს, რომ უნივერსიტეტში სტუდენტური ცხოვრების გაუმჯობესებას გეგმავს და იქ ბევრი რამ არის უკეთესობისკენ შესაცვლელი, ამის გაკეთებას კი სტუდენტებთან ერთად აპირებს:

"ყველას მოვუწოდებ, რომ ერთად ავაშენოთ კარგი, თანამედროვე ევროპული დონის უნივერსიტეტი, რომელიც იქნება მართლაც წამყვანი სასწავლო და სამეცნიერო ძალიან დიდი რეგიონში".

თანამდებობისთვის სულ სამი კანდიდატი იბრძოდა. მათთვის მიცემული ხმები კი ასე გადანაწილდა:

  • განათლების მინისტრის ყოფილი მოადგილე გია შარვაშიძე - 21 ხმა;
  • უნივერსიტეტის პროფესორი ცირა ბარამიძე - 5 ხმა;
  • პროფესორი გიორგი ბარამიძე - 6 ხმა;
  • 4 ხმა - ბათილი;

უნივერსიტეტის აკადემიური საბჭოს წევრების კენჭისყრის პროცედურა 14:00 საათზე დაიწყო და ერთ საათს გაგრძელდა.

კენჭისყრას წინ უძღოდა კანდიდატების გასაუბრება აკადემიური საბჭოს წევრებთან.

გიორგი შარვაშიძე განათლების მინისტრის მოადგილე იყო 2013 წლიდან დღემდე. ასევე, იგი იყო ღია საზოგადოების ინსტიტუტის, აკადემიური მხარდაჭერის პროგრამის დირექტორი 2004-2013 წლებში და განათლების პოლიტიკის, დაგეგმვისა და მართვის საერთაშორისო ინსტიტუტის პრეზიდენტი.

შარვაშიძე ასევე განათლების მინისტრის მოადგილის პოსტს იკავებდა 1994-1996 წლებში და განათლების მინისტრის პირველი მოადგილე იყო 1996-2000 წლებში.