კასპის რაიონის სოფელ აღაიანში ჩვილის მკვლელობის საქმეზე შინაგან საქმეთა სამინისტრომ 17 წლის დედა დააკავა. უწყებაში ამბობენ, რომ დედა დანაშაულს აღიარებს.

შსს განცხადებით, ბრალდებულმა საკუთარ საცხოვრებელ სახლშ, 7 თვის შვილი გვიან ღამით საწოლში გაგუდა და სახლიდან გაიქცა. სამართალდამცველებმა გოგოს ადგილსამყოფელი რამდენიმე საათში დაადგინეს და დააკავეს.

გამოძიება უმწეო მდგომარეობაში მყოფი არასრულწლოვანი ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე, საქართველოს სისხლის სამართლის კოდექსის 11 პრიმა 109-ე მუხლის მე-2 ნაწილის "ბ" და "ვ" ქვეპუნქტებით მიმდინარეობს. აღნიშნული ბრალი 13-დან 17 წლამდე ვადით თავისუფლების აღკვეთას ითვალისწინებს.