სომხეთის პრემიერ-მინისტრი, ნიკოლ პაშინიანი მოსახლეობას მოუწოდებს, რომ ყველა სასამართლოს შესასვლელი გადაკეტონ. აღნიშნული განცხადება პაშინიანმა 19 მაისს გაავრცელა. გარდა ამისა, მან დააანონსა, რომ 20 მაისიდან რევოლუციის მეორე და მნიშვნელოვანი ეტაპი დაიწყება.

პაშინიანი აპირებს, რომ დღეს მოსახლეობას მიმართოს და სასამართლო სისტემის შესახებ ისაუბროს. თავის გუშინდელ მიმართვაში მან აღნიშნა, რომ "მარიონეტული სასამართლო" არ სჭირდებათ.

პრემიერის მოწოდებების შემდეგ მოსახლეობამ სასამართლოების შესასვლელების გადაკეტვა დაიწყო. ორშაბათს დილიდან მოქალაქეებმა რამდენიმე სასამართლოს, მათ შორის საკონსტიტუციო სასამართლოს შესასვლელი უკვე გადაკეტეს. მოწოდებების გამო პაშინიანი გააკრიტიკა ოპოზიციამ. ყოფილმა მმართველმა რესპუბლიკურმა პარტიამ განაცხადა, რომ ეს სასამართლო სისტემაზე ზეწოლაა.

პაშინიანმა პიკეტისრებისკენ მოწოდება მას შემდეგ გაავრცელა, რაც 18 მაისს სასამართლომ ყოფილი პრეზიდენტი, რობერტ ქოჩარიანი პატიმრობიდან მას შემდეგ გაათავისუფლა, რაც არაღიარებული ყარაბაღის ყოფილი და ამჟამინდელი მმართველები თავდებში ჩაუდგნენ. აღნიშნულ გადაწყვეტილებას მოსახლეობის მხრიდან პროტესტი მოჰყვა.

რობერტ ქოჩარიანს 2008 წელს კონსტიტუციური წყობის დამხობასა და დიდი ოდენობით ქრთამის აღებას ედავებიან. ის 2018 წელს დააკავეს.