ზუგდიდის საკრებულოს თავმჯდომარის მოადგილე თაზო ფაცაციამ ნაციონალური მოძრაობის დეპუტატი თინა ბოკუჩავა სექსისტურ და შეურაცხმყოფელ კონტექსტსში მოიხსენია. თაზო ფაცაცია On.ge-სთან ადასტურებს, რომ ეს პოსტი ნამდვილად მან დაწერა. ფაცაციას ჰგონია, რომ მისი ნათქვამი სექსისტური და შეურაცხმყოფელი არ არის.

ფოტო: Tazo Patsatsia / Facebook

მას სექსი და სექსიზმი ერთი და იგივე რამ ჰგონია: "სექსი ნახსენებია? ბილწსიტყვაობა ნახსენებია?.. რაც შეეხება სექსისტურ გამონათქვამს, მე ეგეთი რაღაცები არ მახასიათებს. კარგ ოჯახში ვარ გაზრდილი და ვიცი, ადამიანებთან როგორ ვიურთიერთო, სიტყვის ფასი ვიცი, როგორ ვთქვა. რამე ფონეტიკური შეცდომა თუ ვინმეს არ მოეწონა, ბოდიშის მოხდას არ ვაპირებ".

კითხვაზე, ინფორმირებულია თუ არა თინა ბოკუჩავას განათლებაზე, საკრებულოს თავმჯდომარის მოადგილე პარლამენტის წევრისგან დიპლომის ელექტრონულად გაგზავნას ითხოვს.

კითხვაზე, როგორი რეაქცია ექნება, თუ ვინმე მსგავს პოსტს მისი ოჯახის წევრზე დაწერს, ფაცაცია ასე პასუხობს:

"ჩემი ოჯახის წევრები არ მიაყენებ სხვას ასეთ შეურაცხყოფას [როგორც ბოკუჩავამ ჩვენ მოგვაყენა] და თუ მიაყენებენ, ჩემს ოჯახის წევრზეც დაწერონ".