შინაგან საქმეთა სამინისტრომ თეთრიწყაროში ცოლის მიმართ ოჯახში ძალადობისა და თვითმკვლელობის ცდამდე მიყვანის ბრალდებით ქმარი დააკავეს, ხოლო დედამთილს ბრალი წაუყენეს.

გამოძიების ინფორმაციით, კაცმა მიმდინარე წლის 9 მაისს ქალზე ფიზიკურად იძალადა, აგრეთვე, გარკვეული პერიოდის განმავლობაში სისტემატურად ამცირებდა ცოლისპატივსა და ღირსებას. უწყების განცხადებით, აღნიშნულის გამო ქალმა თვითმკვლელობა სცადა და თვითდაზიანება მიიყენა. დაშავებულს სამედიცინო დახმარება საავადმყოფოში გაეწია. ამჟამად, მის ჯანმრთელობას საფრთხე არ ემუქრება.

გარდა ამისა, პოლიცია განმარტავს, რომ სისტემატური ფსიქოლოგიური ძალადობა გამოიკვეთა დაზარალებულის დედამთილის მხრიდანაც, რის გამოც მას ქალის თვითმკვლელობის ცდამდე მიყვანის ბრალი წარედგინა.

გამოძიება ოჯახში ძალადობისა და ოჯახური დანაშაულის ნიშნით თვითმკვლელობის ცდამდე მიყვანის ფაქტებზე, სისხლის სამართლის კოდექსის 11 პრიმა 115-ე მუხლის პირველი ნაწილითა და 126-ე პრიმა მუხლის პირველი ნაწილით მიმდინარეობს. აღნიშნული მუხლები 2-დან 4 წლამდე ვადით თავისუფლების აღკვეთას ითვალისწინებს.