მოძრაობა სახელმწიფო ხალხისთვის ერთ-ერთი წარმომადგენელი, გიორგი ვაშაძე ამბობს, რომ პრემიერმინისტრი დღეს გაეროს ტრიბუნიდან უფრო მეტად საქართველოს მოსახლეობისთვის საუბრობდა, ვიდრე საერთაშორისო თანამეგობრობისთვის:

"ოკუპაციის თემა უფრო მკვეთრად უნდა ყოფილიყო გამოკვეთილი და მეტი კონკრეტული ინიციატივა ყოფილიყო. რაც შეეხება რეფორმებით ტრაბახს, ძალიან სამწუხაროა, რომ ეს გამოსვლა კიდევ ერთხელ ადასტურებს, რომ ხელისუფლება საერთოდ აცდენილია იმ მდგომარეობას, რაშიც არის ხალხი. ქვეყანაში არის გაჭირვება, ქვეყანაში არის ბევრი პრობლემა. ხელისუფლებამ უნდა იზრუნოს ინვესტიციების მოზიდვაზე და არა ასეთი არარეალისტური შეფასებების გაკეთებაზე რეფორმებთან დაკავშირებით".

დღეს გაეროს გენერალური ასამბლეის 71-ე სესიაზე საქართველოს პრემიერმინისტრი გიორგი კვირიკაშვილი სიტყვით გამოვიდა. მოხსენების ერთ-ერთი მთავარი თემა ქვეყანაში მოახლოებული არჩევნები იყო. ამასთან, მან საქართველოს ტერიტორიაზე რუსეთის სახელმწიფო დუმას არჩევნების ჩატარების ფაქტი დაგმო და ოკუპირებულ ტერიტორიებზე ისაუბრა.