სომხეთის პრემიერ მინისტრი ნიკოლ პაშინიანი მიიჩნევს, რომ ქვეყნის ყველა მოქალაქეს უნდა ჰქონდეს სქესობრივი განათლება. მისი თქმით, ბავშვები იზრდებიან და კონკრეტულ ეტაპზე სჭირდებათ ცოდნა. მისივე თქმით, აუცილებელია ბავშვებისთვის ინფორმაციის სწორად მიწოდება უზრუნველყონ.

"საიდან მიიღებენ ინფორმაციას? ქუჩაში? ინტერნეტში აკრძალული ფილმების ყურებისას, რომელიც მათი ასაკისთვის არ არის გათვალისწინებული? როცა ჩუმად ისარგებლებენ პორნო საიტებით?" — განაცხადა პაშინიანმა პრესკონფერენციაზე.

ასე უპასუხა პაშინიანმა იმ კრიტიკას, რომელიც წიგნის, ჩემი პირადი სხეულის პრეზენტაციამ გამოიწვია. სომხურმა საზოგადოებამ წიგნი მიუღებლად ჩათვალა, პაშინიანმა კი თქვა, რომ გარყვნილება წიგნში ვერ აღმოაჩინა.

"წავიკითხე და ვერაფერი ისეთი ვერ დავინახე. მე პატივისცემით ვეკიდები ხალხს და მზად ვარ მოვუსმინო მათ აზრს იმაზე, რომ ეს გარყვნილებაა. თუ ასეა, საჭიროა აღმოვფხვრათ, მაგრამ მოდი გავიაზროთ რა არის ეს", — აღნიშნა მან.

პაშინიანმა სქესეობრივი განათლების არქონის მინუსებზეც ისაუბრა და განაცხადა, რომ უმეტეს შემთხვევაში იმპოტენციის მიზეზი სწორედ ეს არის.

"ნუთუ ეს არ არის პრობლემა ჩვენი ტრადიციული ოჯახებისთვის? ეს არ არის პრობლემა ჩვენი დემოგრაფიისთვის? ჩვენ არ ვიცით იმიტომ, რომ ამ პრობლემას არ განვიხილავთ, რადგან ოპონენტები იტყვიან: რას განიხილავს პრემიერ-მინისტრი? მეტი საქმე არ აქვს? მაშინ აღარ ვისაუბროთ ეკონომიკურ კრიზისზე, რომ ის აღარ იყოს, არ ვისაუბროთ დემოგრაფიულ პრობლემაზე, რომ ეს პრობლემაც აღარ იყოს. სომხეთის მოქალაქე განათლებული უნდა იყოს", — განაცხადა პაშინიანმა.

პრემიერმა აღნიშნა, რომ გაურკვეველია საიდან იღებენ ინფორმაციას სქესობრივი ცხოვრების შესახებ ის ადამიანები, რომლებიც დაოჯახებას აპირებენ.

"სერიოზულად ვკითხულობ, საიდან გაიგებენ: ქუჩაში, საუბრებში თუ უფროსებს კითხავენ აზრს?", — განაცხადა მან და ჰკითხა დამსწრეებს სურდათ თუ არა ქვეყნის შუა საუკუნეებში დატოვება.

გარდა ამისა პრემიერმა აღნიშნა, რომ სომხეთში არსებობს მავნე პრაქტიკა, როდესაც უფროსები ბავშვებს გინებას ასწავლიან.

"მოდის უფროსი და ეუბნებიან ბავშვს: მიდი აგინე. ესეც ეუბნება მე შენი და მიდის სიცილი", — პრემიერმა პრესკონფერენციაზე სიცილი განასახიერა და განაცხადა, რომ ამ შემთხვევაში რატომღაც არავინ ფიქრობს გარყვნილებაზე.

წიგნის ჩემი პირადი სხეული პრეზენტაცია სომხეთის ერთ-ერთ კაფეში 4 მაისს გაიმართა. Epress-ის ინფორმაციით, ღონისძიებაზე დამსწრებ კაცთა ნაწილმა ორგანიზატორებს კვერცხები ესროლეს. გამოცემა წერს, რომ ამავდროულად ისინი სოციალურ ქსელებში სიძულვილის ენის შემცველი კომენტარებით საზოგადოების პროვოცირებას ცდილობდნენ.