დღეს, 9 მაისს, მეორე მსოფლიო ომში ფაშიზმზე გამარჯვებიდან 74 წელი გავიდა.

ტრადიციულად ამ დღეს ვაკის პარკში როგორც ომის ვეტერანები, ისე ხელისუფლების, სხვადასხვა პოლიტიკური პარტიის წარმომადგენლები თუ რიგითი მოქალაქეები მიდიან და უცნობი ჯარისკაცის საფლავზე ყვავილები მიაქვთ.

ვეტერანები ფაშიზმზე გამარჯვების 74-ე წლისთავთან დაკავშირებით სახელმწიფოსგან ფულად დახმარებას მიიღებენ. შესაბამისი განკარგულება პრემიერმა გამოსცა.

საზეიმო ღონისძიების პარალელურად ვაკის პარკთან ორი აქცია იგეგმება. გამოსვლები დაგეგმილია რეგიონებშიც.

9 მაისს, ფაშიზმზე გამარკვების დღეს თბილისსა და რეგიონებში აქციებია დაგეგმილი. 9 მაისს თბილისში, ჭავჭავაძის გამზირზე "გამარჯვების დღესთან" დაკავშირებით რუსეთში დაფუძნებული ორგანიზაციის, უკვდავთა პოლკის ინიციატივით მსვლელობა გაიმართება. თბილისის გარდა მსვლელობა მოეწყობა ბათუმში, ნინოწმინდაში, ახალქალაქსა და გორში.

უკვდავთა პოლკის მსვლელობის პარალელურად აქცია არა პუტინის მარშს! იმართება. აქციის ორგანიზატორების აზრით, "უკვდავი პოლკი პუტინის პროპაგანდისტული რეჟიმის პროექტია და კრემლის კოლაბორაციონისტულ ძალებს აძლიერებს ყველგან, სადაც ოფიციალურ მოსკოვს საკუთარი ინტერესები აქვს".