რუსთავი 2-ის გენერალური დირექტორის, ნიკა გვარამიას განცხადებით, ის ქართული ოცნების თავმჯდომარის, ბიძინა ივანიშვილის წინააღმდეგ ომში ერთვება. ამის შესახებ გვარამიამ Facebook live-ში ისაუბრა.

"მე ჩართული ვარ დიდი ხანია ამ ომში, მაგრამ მე ვერთვები მთელი ჩემი შესაძლებლობებით. მე ვაპირებ მასთან პოლიტიკურ დაპირისპირებას. რა ფორმით გავაკეთებ ამას, უახლოეს მომავალში გადავყწვეტ. მე ვაპირებ, ყველა შესაძლო ფორმით გავხიო ბიძინა ივანიშვილის მმრთველობა საქართველოში. ეს იქნება ბრძოლა არა რუსთავი 2-ის, არამედ საქართველოს გადასარჩენად", — თქვა გვარამიამ და ყველა პოლიტიკურ ძალას კონსოლიდაციისკენ მოუწოდა.

ნიკა გვარამიამ დღეს, 6 მაისს საგანგებო ბრიფინგი გამართა, სადაც თქვა, რომ ტელეკომპანიის წილის ცხრა პროცენტის მფლობელი, ნინო ნიჟარაძე სხვა მეწილეებისგან 26 მილიონს ითხოვს. ის ამბობს, რომ სარჩელით ნიჟარაძემ სასამართლოს მიმართა. გვარამია ამ ყველაფერს ტელევიზიაზე შეტევის ახალ ფაზად აფასებს.

გვარამია აცხადებს, რომ ამ ყველაფრის მიზანი რუსთავი 2-ის სარედაქციო პოლიტიკის შეცვლაა და ეს სარჩელი კონკრეტულად მას, ამ ყველაფრის გარანტს ეხება. გვარამია ამბობს, რომ მთავარი მოთხოვნა მისი, როგორც დირექტორის, უფლებამოსილების შეწყვეტა იქნება, რაც ქართულმა სასამართლომ ივანიშვილის დავალებით ბევრჯერ სცადა.