პაატა ბურჭულაძე - მოძრაობა სახელმწიფო ხალხისთვის ერთ-ერთი წარმომადგენელი, იაგო ხვიჩია განმარტავს, რომ მოაწერს თუ არა ე.წ. სამშვიდობო მემორანდუმს პოლიტიკური სუბიექტი ხელს, პრინციპული მნიშვნელობა არ აქვს:

"პასუხისმგებლობა წინასაარჩევნო გარემოს მშვიდობიანად ჩავლაზე და პოსტსაარჩევნო გარემოს ასევე მშვიდობიანად ჩავლაზე, პასუხისმგებლობა ეკისრება მხოლოდ და მხოლოდ ხელისუფლებას. ჩვენს პარტიას აქვს თავისი მორალი და ზუსტად ვიცით, როგორ არ უნდა მოვიქცეთ ამ მორალის საწინააღმდეგოდ. მაგრამ, თუ ვიღაც მოიქცევა ცუდად, ამასთან დაკავშირებით პასუხისმგებლობის დაკისრება, თუნდაც იმ პარტიაზე, ვისი წევრებიც ცუდად იქცევიან, არის აბსურდი. პასუხისმგებლობა უნდა აიღოს ხელისუფლებამ. მან ყველა თავისი რესურსი უნდა გამოიყენოს იმისთვის, რომ [არჩევნები] ჩაატაროს მშვიდობიანად".

დღეს პარტია ქართული ოცნების აღმასრულებელმა მდივანმა, ირაკლი კობახიძემ, 8 ოქტომბრის პარლამენტის არჩევნებისთვის საარჩევნო აგიტაციის დროს კონტრაქციების თაობაზე ე.წ. სამშვიდობო მემორანდუმის ტექსტი გაასაჯაროვა.

21 სექტემბერს, სპეციალურად გამართულ ბრიფინგზე, კობახიძემ განმარტა, რომ მემორანდუმის ტექსტი არჩევნებში მონაწილე პარტიებს დღესვე გადაეგზავნებათ და მმართველი გუნდი მათ გამოხმაურებას დაელოდება.

დღესვე რესპუბლიკელების ლიდერმა, დავით უსუფაშვილმა მემორანდუმის ტექსტი ამობეჭდა და მას მედიის წარმომადგენლების თვალწინ მოაწერა ხელი.

რაც შეეხება ერთიან ნაციონალურ მოძრაობას, ის აღნიშნულ დოკუმენტზე ხელის მოწერას არ აპირებს.