დიდი ბრიტანეთის თავდაცვის მინისტრი, გევინ იულიამსონი საიდუმლო ინფორმაციის გავრცელების გამო გაათავისუფლეს. საქმე ეხება უშიშროების საბჭოს სხდომიდან ინფორმაციის გაჟონვას, რაზეც შიდა გამოძიება დაიწყო. იულიამსონი თავდაცვის მინისტრი 2017 წელს გახდა

იულიამსონს პოსტზე საერთაშორისო განვითარების მინისტრი, პენი მორდონტი შეცვლის. ის იქნება პირველი ქალი, რომელიც თავდაცვის მინისტრის თანამდებობას დაიკავებს.

როგორც მინისტრთან კაბინეტის მიერ გავრცელებულ განცხადებაში წერია, პრემიერ-მინისტრი, ტერეზა მეი არ არის დარწმუნებული, რომ გევინ უილიამსონს თავდაცვის მინისტრის თანამდებობაზე მუშაობა შეუძლია, რის გამოც მთავრობის დატოვება სთხოვა. გარდა ამისა, წერილში აღნიშნულია, რომ გაჟონვის სხვა წყარო დადგენილი არაა.

მთავრობაში განაცხადეს, რომ გადაწყვეტილება გამოძიების შედეგებზე დაყრდნობით მიიღეს, რომელიც ეროვნული უშიშროების საბჭოდან ინფორმაციის გაჟონვას ეხებოდა. აღნიშნულ საბჭოს სხდომაზე Huawei-სთან 5G ქსელის შექმნის თანამშრომლობას განიხილავდნენ.

ინფორმაციამ 24 აპრილს გაჟონა. ამის გამო ცნობილი გახდა, რომ მიუხედავად უსაფრთხოების რისკებისა, ბრიტანეთი აპირებდა ნება დაერთო ჩინური კომპანიისათვის მონაწილეობა მიეღო ქვეყნის 5G ქსელის შექმნაში.

დიდი ბრიტანეთისა და ჩინური კომპანიის თანამშრომლობის წინააღმდეგ აშშ და ზოგიერთი მინისტრი აქტიურად გამოდიოდნენ. ისინი თვლიდნენ, რომ ეს ეროვნულ უსაფრთხოებას საფრთხეს შეუქმნიდა.

იმის გამო, რომ უშიშროების საბჭოს შეხვედრები მკაცრად კონფიდენციალურია, Huawei-სთან თანამშრომლობის შესახებ ინფორმაციის გავრცელებამ დიდი სკანდალი გამოიწვია. შეხვედრას ცხრა პირი ესწრებოდა და თავდაცვის ყოფილმა მინისტრმა პირველმა განაცხადა, რომ ის და მისი გუნდი გაჟონვის წყარო არ ყოფილან და ამას დღემდე უარყოფს.

როგორც ადგილობრივი მედია წერს, მეი უილიამსონს პირველ მაისს შეხვდა და უთხრა, რომ მის ხელთარსებული სამხილები უილიამსონის დანაშაულზე მეტყველებს.