აშშ-ს სახელმწიფო მდივანმა, მაიკ პომპეომ განაცხადა, რომ ვენესუელის პრეზიდენტი, ნიკოლას მადურო არეულობის ფონზე მზად იყო ქვეყანა დაეტოვებინა, თუმცა რუსეთმა გადააფიქრებინა.

"მადურო დიდი ხანია არავის უნახავს. მას თვითმფრინავი ჰქონდა გამზადებული, ის მზად იყო დილით ადრე წასულიყო, თუმცა რუსებმა უთხრეს, რომ უნდა დარჩეს", — აღნიშნა პომპეომ. სახელმწიფო მდივანმა დააზუსტა, რომ მადურო კუბაში მიფრინავდა.

რუსეთის საგარეო საქმეთა სამინისტრომ მაიკ პომპეოს სიტყვებს ტყუილი უწოდა და განაცხადა, რომ ოფიციალური ვაშინგტონი ყალბ ამბებს საინფორმაციო ომისთვის იყენებს. თავის მხრივ პომპეოს განცხადებას ტყუილი უწოდა ნიკოლას მადურომაც.

ვენესუელის ოპოზიციური მოძრაობის ლიდერმა ხუან გუაიდომ 30 აპრილს განაცხადა, რომ არმიის მხარდაჭერა მიიღო და ნიკოლას მადუროს დამხობის "საბოლოოდ ეტაპი" დაიწყო. კარაკასში საპროტესტო დემონსტრაციები დაიწყო და რამდენჯერმე იყო შეტაკება მოსახლეობასა და სამხედროებს შორის. ბოლო მონაცემებით, 70 ადამიანი დაშავდა, ხოლო 80 დააკავეს.

მოგვიანებით მადურომ ტელემიმართვაში განაცხადა, რომ სახელმწიფო გადატრიალების გეგმა ჩავარდა. გუადომ კი აღნიშნა, რომ პროტესტი პირველ მაისსაც გაგრძელდებოდა.