ნიუ-იორკის ცენტრში მომხდარ აფეთქებაში და ნიუ-ჯერსიში ბომბების განთავსებაში ბრალდებული ამერიკის პოლიციამ გუშინ, 20 სექტემბერს, დააკავა.

"ქუჩებში ბომბების ხმას გაიგონებთ" - წერია 28 წლის აჰმად რაჰამის პირად დღიურში, რომელიც პოლიციამ მისი დაკავებისას აღმოჩენილ გამოძიებისთვის მნიშვნელოვან სხვა მრავალ მტკიცებულებებთან ერთად იპოვა. ინფრომაციას CNN ავრცელებს.

ამერიკის მოქალაქე რაჰამს ბრალად ედება მასობრივი განადგურების იარაღისა და დესტრუქციული მოწყობილობების გამოყენება, ხალხმრავალი ადგილების აფეთქება და საჯარო ქონების განადგურება. მის წინააღმდეგ არსებულ ბრალდებებში ასევე შედის ნიუ-ჯერსიში პოლიციისთვის ცეცხლის გახსნა და სამართალდამცავის მოკვლის მცდელობა.

BBC-ის ცნობით, მას მოგვიანებით ბრალად წაუყენეს ნიუ-ჯერსის ქალაქ ელიზაბეტში ნაპოვნ ასაფეთქებელ მოწყობილობებთან კავშირი. სწორედ ამ ქალაქში ცხოვრობდა რაჰამიც.

ნიუ-იორკის ცენტრში აფეთქება 17 სექტემბერს ღამით, 23-ე ქუჩისა და მე-6 ავენიუს კვეთაზე მოხდა, ხელნაკეთი ასაფეთქებელი სანაგვე ურნაში იყო ჩამონტაჟებული. ინციდენტის შედეგად 31 ადამიანი დაშავდა.