ქუთაისიდან ვენის (ავსტრია) მიმართულებით მიმავალ მგზავრებს საბუთებსა და დღეების მიხედვით საჭირო თანხას აეროპორტში შეუმოწმებენ. ამის შესახებ On.ge-ს ინფორმაცია ქუთაისის აეროპორტში დაუდასტურეს.

აეროპორტის პრესსამსახურში ამბობენ, რომ ავსტრიის მოთხოვნით, ევროკავშირის საზღვრის დაცვის წარმომადგენლები საქართველოში ჩამოვიდნენ. მიზეზი ისაა, რომ ქვეყნიდან წასულ არაერთ მოქალაქეს მოუწესრიგებელი საბუთებისა თუ არასაკმარისი თანხის გამო უკან აბრუნებდნენ.

საჭირო თანხა ევროკავშირის/შენგენის წევრი თითოეული ქვეყნის შიდა კანონმდებლობით განისაზღვრება. საქართველოს საგარეო საქმეთა სამინისტროს ინფორმაციით, სასტუმროს ხარჯის გარდა, ეს თანხა, როგორც წესი, არ აღემატება დღეში 50 ევროს.

ქუთაისის აეროპორტის განმარტებით, ამ ეტაპზე მსგავსი მოთხოვნა მხოლოდ ავსტრიის მხრიდან არსებობს და ევროკავშირის სხვა ქვეყნებს, სადაც საქართველოდან უვიზო მიმოსვლაა, მსგავსი სურვილი არ გამოუთქვამთ.