ზუგდიდის საავადმყოფოში ათი უცხოელი ბავშვი კვებითი ინტოქსიკაციით გადაიყვანეს. მათგან უმცროსი 7 თვისაა, ხოლო უფროსი — 11 წლის. ბავშვებს თან ახლდათ მეურვე ქალი, რომელიც უკრაინის მოქალაქეა. ადგილობრივები რუსთავი 2-თან ყვებიან, რომ ბავშვებს საკვები და ჩასაცმელი არ ჰქონდათ. როგორც ექიმი ამბობს, არასრულწოვნებს გულისრევის შეგრძნება, ღებინება, სისუსტე და ნაწლავთა არამყარი მოქმედება აღენიშნებათ.

როგორც შინაგან საქმეთა სამინისტროში On.ge-ს უთხრეს, ქალი 10 ბავშვით მოსკოვი-თბილისის რეისით 8 აპრილს ჩამოფრინდა. სამინისტროს ხელთარსებული დოკუმენტაციის მიხედვით, ათივე ბავშვი ამ ქალის შვილია. უწყებაში ამბობენ, რომ ისინი აფხაზეთში გადასვლას გეგმავდნენ.

სამინისტროში განაცხადეს, რომ 10 მცირეწლოვანი ბავშვიდან 4 დაბადებულია 2017 წელს, რამაც გააჩინა ეჭვი, რომ აღნიშნული შეიცავდა ტრეფიკინგის ნიშნებს.

შინაგან საქმეთა სამინისტრომ დაიწყო გამოძიება სისხლის სამართლის კოდექსის 143 პრიმა მუხლის პირველი ნაწილით (ადამიანით ვაჭრობა — ტრეფიკინგი). გამოძიების ფარგლებში მიმდინარეობს თანამშრომლობა უცხოელ პარტნიორებთან.

რუსთავი 2 ესაუბრა ბავშვების სავარაუდო მამას, რომელიც ამტკიცებს, რომ სოხუმში ბინა იქირავა, სადაც მისი ოჯახი მიემგზავრებოდა. როგორც ის ამბობს, თბილისში მისი ოჯახი ათი დღის წინ ჩამოვიდა და ზუგდიდის გავლით აფხაზეთში მიდიოდა. მისივე თქმით, ბავშვებიდან ექვსი სუროგაციით გააჩინეს. ის ბავშვების მიმართ ტრეფიკინგის ბრალდებებს უარყოფს.