ხადორი 3 ჰესთან დაკავშირებით პანკისის ხეობაში გადაწყვეტილება მიღებულია, ჰესი არ უნდა აშენდეს. ამის შესახებ სამოქალაქო აქტივისტმა პანკისიდან, სულხან ბორძიკაშვილმა სახალხო კრების დასრულების შემდეგ ტელეკომპანია პირველს განუცხადა.

მისი თქმით, ხადორი 3-ის საკითხი, სახალხო კრებამდეც გადაწყვეტილი იყო:

"ამ მომენტში წერტილდასმულია ხადორი 3-ის მშენებლობის თემა, საერთოდ ამის დაშვებაზე მოლაპარაკების გამართვა".

ის ამბობს, რომ ხადორი 3-სგან გასხვავებით, სამყურისწყალზე დაგეგმილ ჰესზე ხეობაში მზაობა არსებობს. პანკისის ხეობაში ხადორი 2-ის გარდა, კიდევ შენდება მეორე ჰესი, სამყურისწყალი 2. სწორედ, ამ ჰესის ასაშენებლად მოლაპარაკებაზე არიან მზად სოფელ ჯოყოლას მკვიდრები.

"ამაზე თავისუფლად შეიძლება მოლაპარაკება და ახლო მომავალში ამ ჰესის მშენებლობის დაწყება, 50-ჯერ უფრო დიდია ხადორი 3-ზე და ბევრად უფრო მომგებიანი რეგიონისთვისა და ინვეტსორისთვისაც", — განაცხადა ბორძიკაშვილმა.

მისი თქმით, ადგილობრივები დაანონსებულ დაკავებებს ელოდებიან. ბორძიკაშვილის თქმით, თუ აქციის მონაწილეებს დაიჭერენ, ყველა ჩავა სამმართველოში და ჩაბარდება.

დაპირისპირება პანკისი ხეობაში

21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. ადგილობრივებმა მდინარე ალაზანზე მშენებარე ჰესზე ტექნიკის შესვლა გააპროტესტეს, რასაც იქ მობილიზებულ პოლიციასთან დაპირისპირება მოყვა. როგორც შინაგან საქმეთა სამინისტროში განმარტეს, დილას სოფელში პოლიცია ეკონომიკის სამინისტროს მიმართვის საფუძველზე შეიყვანეს, სპეცდანიშნულების რაზმები კი დაპირისპირების გამო დაამატეს.

ჰესების საკითხზე სალაპარაკოდ თელავში მთავრობისა და ადგილორივების წარმომადგენლებს შორის შეხვედრა გაიმართა, თუმცა პარალელურად პანკისში ვითარება დაიძაბა. სპეცრაზმმა აქციის მონაწილეების წინააღმდეგ ორჯერ ცრემლსადენი გაზი და რეზინის ტყვიები გამოიყენა. ადგილობრივებმა კი პოლიციას ქვები და ხელკეტები დაუშინეს. შსს-ს განცახდებით, შედეგად დაშავდა 55 ადამიანი, მათ შორის 38 სამართალდამცავი.

რამდენიმე საათში შემთხვევის ადგილას მთავრობის წარმომადგენლები ჩავიდნენ. შინაგან საქმეთა მინისტრმა, გიორგი გახარიამ თემის უხუცესებთან შეხვედრის შემდეგ განაცხადა, რომ ჰესი მანამ არ აშენდება, სანამ მოსახლეობის 90%-ს არ ექნება ამის სურვილი.

მთავრობის ადმინისტრაციამ დაპირისპირების შემდეგ განცხადება გაავრცელა, რომელშიც ჰესების სარგებლიანობაზე ისაუბრეს. მათი თქმით, საჭირო იყო ამ ინფორმაციის ადგილობრივებისთვის მიწოდება.