ცოლზე მუქარასა და ძალადობაში ბრალდებული საქართველოს ძიუდოს ეროვნული ნაკრების წევრი, თორნიკე ნაგლიაშვილი გირაოს სანაცვლოდ გაათავისუფლეს. ბოლნისის რაიონულმა სასამართლომ მას 5 000-ლარიანი გირაო შეუფარდა.

თორნიკე ნაგლიაშვილი ოჯახში ძალადობის ბრალდებით 5 მარტს დააკავეს. ამის შესახებ ინფორმაცია თავდაპირველად საინფორმაციო სააგენტო რეკორდერმა გაავრცელა. ძიუდოისტის დაკავება On.ge-ს შინაგან საქმეთა სამინისტროში დაუდასტურეს.

მას ბრალი სისხლის სამართლის კოდექსის 11¹-151-ე მუხლით და 126¹ მუხლით წარედგინა, რაც ოჯახში დანაშაულისთვის პასუხისმგელობას, მუქარასა და ოჯახში ძალადობას გულისხმობს.

საინფორმაციო სააგენტოს ცნობით, ძიუდოისტს ცოლის მიმართ შემაკავებელი ორდერი ჰქონდა გამოწერილი, თუმცა ის არაერთხელ დაარღვია. მათივე ინფორმაციით, ნაგლიაშვილი ცოლისთვის გაგზავნილი მუქარის შემცველი მესიჯების გამო დააკავეს, რომელიც ძიუდოისტის მეუღლემ პოლიციაში წარადგინა.