ხარისხის არხი ბრენდულ დასახელებას იცვლის და სამეფო არხი ხდება. ტელევიზიის დამფუძნებლის, გიორგი ასათიანის თქმით, სახელის შეცვლა დიდი ხნის განმავლობაში სურდათ.

"ეს 1999 წლიდან გვინდოდა. ჯერ ნავიგატორი ერქვა არხს, მერე დრო, მერე ხარისხის არხი, მერე დრო და მერე ისევ ხარისხის არხი. ჩვენი მიზანი ყოველთვის იყო მონარქიული არსობრივი სტრუქტურის წარმოჩენა საზოგადოებისთვის; სიყვარულზე დაფუძნებული, ტოლერანტობაზე, ლიბერალურზე, კარგი გაგებით", — განუცხადა ასათიანმა On.ge-ს.

ის განმარტავს, რომ თავიდან ხალხი ამას ვერ გაიგებდა, მაგრამ ახლა მათ ელექტორატი ყავს, რომელსაც უყვართ და მზად არიან ცვლილებისთვის. მისი თქმით, სამეფო ოჯახთან ექსკლუზიური მემორანდუმი აქვთ გამოფრმებული და მეფე-დედოფალთანაც ახლო ურთიერთობა აქვთ.

"ხარისხის არხი ყოველთვის ასოცირდება, როგორც გამოსახულებით, ასევე შინაარსით ტექნოლოგიურ-ხარისხობრივ დონესთან. სამეფო ამ ხარისხს მოიცავს. მთელ მსოფლიოში, როცა როიალ ანუ სამეფო განმარტება აქვს რაიმეს ეს უკვე გულისხმობს ხარისხს და უფრო მეტს. შეკმაზულია ამ სამეფო ფერში, მორთული, ხო ხვდებით. შესაბამისად, ჩვენს ტელევიზიას აქვს ამის პრეტენზია", — აცხადებს ასათიანი.