16 აპრილს პანორამა თბილისის მშენებლობიდან ჩამოვარდნილი მუშების მდგომარეობა სტაბილურია. 21 წლის გიორგი ლიპარტელიანი და 19 წლის ნოდარ ჩახალიანი მკურნალობას კლინიკა ამტელის რეანიმაციულ განყოფილებაში აგრძელებენ.

რუსთავი 2-თან საუბრისას ექიმმა აღნიშნა, რომ ორივე პაციენტს აქვს თავის ტვინის ტრავმა, დაჟეჟილობები და სხეულის დაზიანებები, ისინი 8-9 მეტრის სიმაღლიდან გადმოვარდნენ და სხვა დეტალები არ ახსოვთ.

20 წლის დავით ოჩხიკიძეს ინგოროყვას სახელობის კლინიკაშია მოთავსებული, მას ექიმები განმეორებით, დამატებით კვლევას უტარებენ. ექიმის განცხადებით, მას აქვს ნეკნების მოტეხილობა, ფილტვების დაჟეჟილობა, ქალა ტვინის ტრავმა და ტვინის შერყევა. პაციენტს ოპერაცია არ სჭირდება და ის ფაქტი, რომ მდგომარეობა სტაბილურია უკვე დადებითია.

16 აპრილს პანორამა თბილისის მშენებლობიდან 3 მუშა გადმოვარდა. შრომის ინსპექტირების დეპარტამენტმა ობიექტზე სამშენებლო სამუშაოები შეაჩერა.

შინაგან საქმეთა სამინისტროს ცნობით, მომხდარზე გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.