საფრანგეთის პრეზიდენტი, ემანუელ მაკრონი ამბობს, რომ პარიზის ღვთისმშობლის ტაძრის აღდგენა ხუთ წელიწადშია შესაძლებელი. ამის შესახებ მან სატელევიზიო მიმართვაში ისაუბრა.

"ჩვენ აღვადგენთ ნოტრ-დამს და ის კიდევ უფრო მშვენიერი იქნება. მინდა, მისი რეკონსტრუქცია ხუთ წელიწადში დასრულდეს. ჩვენ შეგვიძლია ამის გაკეთება და ჩვენ მოვბილიზდებით ამის გასაკეთებლად", — თქვა მაკრონმა ტელემიმართვაში.

15 აპრილს საფრანგეთში, პარიზის ღვთისმშობლის ტაძარში ხანძარი გაჩნდა. პარიზის პროკურატურაში გამოძიების წინასწარ შედეგებზე დაყრდნობით აცხადებენ, რომ ტაძარში ცეცხლი შემთხვევით გაჩნდა.

მეხანძრეებმა ტაძრის სტრუქტურის სრული განადგურებისგან გადარჩენა შეძლეს. ხანძრის შედეგად, ტაძრის ხის სახურავი მთლიანად დაიწვა. პარიზის ღვთისმშობლის ტაძრის წარმომადგენლები აცხადებენ, რომ ხანძარი რელიკვიებს არ შეხებია.

პარიზის ღვთისმშობლის ტაძარი ცნობილი, როგორც ნოტრ-დამი — გოტიკური საკათედრო ტაძარია პარიზის ილ-დე-ლა-სიტეს აღმოსავლეთ ნაწილში. ის დღემდე მოქმედი რომაულ-კათოლიკური კათედრალია/ პარიზის ნოტრ-დამი ფრანგული გოთიკური არქიტექტურის ერთ-ერთ ყველაზე დახვეწილ ნიმუშად ითვლება.