საქართველოს კულტურის სამინისტროს პრეს სამსახურის ინფორმაციით, დღეს თელავში მუსიკის საერთაშორისო ფესტივალის ჩატარებასთან დაკავშირებით პრესკონფერენცია გაიმართა, რომლსაც საქართველოს კულტურისა და ძეგლთა დაცვის მინისტრი მიხეილ გიორგაძე, ფესტივალის დირექტორი თამარ ლორთქიფანიძე და საქართველოში პოლონეთის ელჩი ანდჟეი ჩიეშკოვსკი ესწრებოდნენ.

თელავში მუსიკის საერთაშორისო ფესტივალი 9-15 ოქტომბერს CheckinGeorgia-ს ფარგლებში ჩატარდება. ფესტივალი 1980-იან წლებში ელისო ვირსალაძის დაარსებულია და 2010 წლიდან ყოველწლიურად ტარდება.

წლევანდელი პროგრამა მევიოლინე ოლეგ კაგანის 70 წლისთავს ეძღვნება, რომელიც ფესტივალის დაარსების ერთ-ერთი თანამოაზრეა ელისო ვირსალაძეს და ნატალია გუტმანთან ერთად.

თელავს ფესტივალის ფარგლებში კრაკოვის (პოლონეთი) ბეთჰოვენის აკადემიის ორკესტრი ეწვევა და მათი მონაწილეობით ორი კონცერტი გაიმართება. ორკესტრს იაცეკ კასპშიკი და მირიან ხუხუნაიშვილი უდირიჟორებენ.

სულ ჩატარდება ხუთი კონცერტი, რომლშიც მონაწილეობას მიიღებენ მუსიკოსები:

  • კოლია ბლახერი - მევიოლინე;
  • ელისო ვირსალაძე - პიანისტი;
  • ალექსანდრე ბუზლოვი - მევიოლინე;
  • უილიამ დატონი (დიდი ბრიტანეთი);
  • ჩან უეი (ჩინეთი);
  • დმიტრი შიშკინი (რუსეთი);
  • დავით ოისტრახის სახელობის სიმებიანი კვარტეტი;
  • თბილისის სახელმწიფო კამერული ორკესტრი საქართველოს სინფონიეტა;

ფესტივალზე შეასრულებენ როგორც კლასიკური მუსიკის შედევრებს, ასევე მე-20-ე საუკუნის ცნობილი კომპოზიტორების ნაწარმოებებს. როგორც კულტურის სამინისტროს პრეს სამსახური იუწყება ზოგიერთი მათგანი საქართველოში პირველად შესრულდება.

კონცერტების პარალელურად დაგეგმილია მასტერკლასები ფორტეპიანოსა და ჩასაბერი ინსტრუმენტების სპეციალობებში, რომლებშიც კონსერვატორიის სტუდენტებთან ერთად, საქართველოს რეგიონებიდან ჩამოსული ახალგაზრდები მიიღებენ მონაწილეობას.