საქართველოს საგარეო საქმეთა სამინისტროს დელეგაციამ მადაგასკარში ჩავიდა, სადაც ქვეყნის საგარეო უწყებასთან პირველი პოლიტიკური დებატები გამართა.

11-12 აპრილის შეხვედრაზე საქართველოს დელეგაციას ხელმძღვანელობდა საგარეო საქმეთა მინისტრის მოადგილე ალექსანდრე ხვთისიაშვილი, ხოლო მადაგასკარის მხარეს საგარეო საქმეთა სამინისტროს გენერალური მდივანი ტაჰირი რაციმანდაო. როგორც უწყების განცხადებაში წერია, შეხვედრის ფარგლებში განხილული იქნა ორ ქვეყანას შორის ორმხრივ და მრავალმხრივ ფორმატებში თანამშრომლობის საკითხთა ფართო სპექტრი, სავაჭრო-ეკონომიკურ, საინვესტიციო, კულტურის, განათლების, მეცნიერებისა და ტურიზმის სფეროებში თანამშრომლობის პერსპექტივები.

კონსულტაციების ფარგლებში ქვეყნებს შორის ურთიერთობების ხელშესაწყობად ორმხრივი სამართლებრივი ჩარჩოს ჩამოყალიბებისა და განვითარების სამოქმედო გეგმა შემუშავდა.

"ქართულმა მხარემ, ასევე, დაადასტურა მზადყოფნა მადაგასკარის მხარეს გაუზიაროს სახელმწიფო სერვისების, ეკონომიკური განვითარების და სხვა სფეროებში საქართველოს მიერ გატარებული წარმატებული რეფორმების გამოცდილება", — აღნიშნულია განცხადებაში.

საქართველოს დელეგაციამ მადაგასკარელ კოლეგებს მიაწოდა ინფორმაცია რუსეთის მიერ ოკუპირებულ საქართველოს რეგიონებში უსაფრთხოების, ადამიანის უფლებების და ჰუმანიტარულ სფეროში შექმნილი მდგომარეობის შესახებ.

ანტანანარივოში ვიზიტისას, დელეგაცია შეხვდა მადაგასკარის პრემიერ-მინისტრს, ქრისტიან ნცაის, მადაგასკარის საგარეო საქმეთა მინისტრს, ნიაინა ანდრიანციტოჰაინას და მადაგასკარის სენატის პრეზიდენტს, რივო რაკოტოვაოს. საქართველოს დელეგაციამ შეხვედრები გამართა მადაგასკარის ეკონომიკური განვითარების საბჭოსთან, ტურიზმის ეროვნულ ბიუროსთან, მადაგასკარის ექსპორტიორ და იმპორტიორ, ასევე, სასარგებლო წიაღისეულის მომპოვებელ კომპანიებთან. საუბარი შეეხო საქართველოს და მადაგასკარის ბიზნეს სექტორებს შორის თანამშრომლობის შესაძლებლობებს.

მადაგასკარის რესპუბლიკაში ვიზიტის ფარგლებში, საქართველოს საგარეო საქმეთა მინისტრის მოადგილემ და თანმხლები დელეგაციის წევრებმა მონაწილეობა მიიღეს ანტანანარივოში საქართველოს საპატიო საკონსულოს გახსნის ცერემონიაში.