ქართული ოცნების დეპუტატის მამუკა მდინარაძის თქმით, ოპოზიციას მაშინ დაეთანხმება, თუ იტყვიან, რომ პრეზიდენტის მიერ მოსამართლეობის კანდიდატების წარდგენის წესიც პრობლემური იყო. ამის შესახებ მამუკა მდინარაძემ იურიდიულ კომიტეტზე განაცხადა, სადაც მეორე მოსმენით განიხილავენ უზენაესის მოსამართლეთა არჩევის წესს.

"რატომ არ იყო არასდროს პროტესტი იმაზე, რომ არც ერთი პროცედურა, არც ერთი კრიტერიუმი არ იყო დაწერილი არსად, არც ერთ კანონში, არც ერთ ნორმატიულ აქტში, რომლის მიხედვითაც პრეზიდენტს ექნებოდა ვალდებულება, წარმოედგინა მოსამართლეობის კანდიდატი. ამაზე არავინ არაფერს არ ამბობდა", — განაცხადა მამუკა მდინარაძემ.

მისი თქმით, საუბრები, რომ უზენაესის მოსამართლეთა 10-კაციანი სია ბნელ ოთახში დაიწერა, არც ქართულმა ოცნებამ მიიღო, როგორც მოცემულობა და კანონპროექტზე მუშაობა დაიწყო.

"პრეზიდენტი ნათელ ოთახში წერდა, თავის თანამშრომლებს რომ აგზავნიდა კანდიდატებად? რაც გვაწყობს ის არის პრობლემა და რაც არ გვაწყობს ის არა? პრეზიდენტი არ წერდა სარდაფში? ნათელ ოთახში წერდა? გულწრფელობაში რომ შემოგყვეთ და დაგიჯეროთ უნდა თქვათ, რომ ისიც პრობლემა იყო", — განაცხადა მამუკა მდინარაძემ.

იურიდიულ საკითხთა კომიტეტის სხდომაზე 2 საათის განმავლობაში კამათობდნენ უზენაესის მოსამართლეთა კანონპროექტის განხილვის გადადებაზე. ოპოზიცია და არასამთავრობო სექტორი ქართულ ოცნებას პირობის დარღვევაში ადანაშაულებდა და მოუწოდებდა მეორე მოსმენა ვენეციის კომისიის დასკვნის შემდეგ გაემართა. ქართული ოცნების დეპუტატების თქმით, კომისიის დასკვნა ხვალ გამოქვეყნდება და ისინი ყველა შენიშვნას პლენარულ სხდომაზე გაითვალისწინებენ. საბოლოოდ, დღის წესრიგს უყარეს კენჭი და გადაწყდა, რომ მოსამართლეების შესახებ კანონპროექტს მაინც დღეს განიხილავენ.

ამავე თემაზე: