და აი, ეს დღეც დადგა! სრულიად სამყარო გამუდმებით დროს აკონტროლებს და მოუთმენლად ელის იმ რამდენიმე საათის გასვლას, რაც HBO-ს საკულტო სერიალის სამეფო კარის თამაშები ფინალური სეზონის გამოსვლამდე დარჩა.

ეს სეზონი რომ ყველაზე მასშტაბური, საინტერესო და დიდებული იქნება, უკვე ბევრჯერ ითქვა როგორც შოუს შემქმნელების, ასევე არხის ხელმძღვანელობის მხრიდან. ეს გასაკვირი არც არის, რადგან თითოეული ეპიზოდის გადაღება $20 ან მეტი მილიონი დაჯდა.

Game Of Thrones-ის ფინალური სეზონის გამოსვლით სატელევიზიო შოუების ისტორიაში ერთ-ერთი დიდი ეპოქა სრულდება და რა თქმა უნდა, ამის გამოტოვებას შოუს ფანები არ აპირებენ.

თანაც, გამომდინარე იქიდან, რომ თანამედროვე სამყაროში ძალიან რთულია სპოილერების თვიდან აცილება, უმეტესობას ურჩევნია, რომ დღევანდელი ღამის 05:00 საათს დაელოდოს და პირდაპირ ეთერში ნახოს, როგორ დაიწყება ყინულისა და ცეცხლის დასასრულის დასაწყისი.

საბედნიეროდ, სერიალის ფინალური სეზონის პირდაპირ ეთერში ნახვა საქართველოშიც შეგვიძლია. ამის დასააანონსებლად კი რამდენიმე კომპანიამ დიდი ხნით ადრე დაიწყო ფართომასშტაბიანი კამპანია.

მაშ ასე, GOT-ის ფინალის ნახვა შეგიძლიათ GDS-ზე. არხმა HBO-სგან სერიალის გაშვების ექსკლუზიური პაკეტი შეიძინა, რაც იმას ნიშნავს, რომ მაყურებელს ლაივ რეჟიმში შეეძლება გაიგოს, როგორ განვითარდება მოვლენები ვესტეროსში.

კიდევ ერთი კომპანია, რომელმაც მაყურებელს სამეფო კარის თამაშების პირდაპირ ეთერში ყურება შესთავაზა აჭარანეტია. ამისთვის მათ სპეციალური საიტიც კი შექმნეს, სადაც თითოეულ თქვენგანს შეეძლება შოუს გამოსვლამდე უკანასკნელი წუთები აითვალოს.

როგორც ხედავთ, არჩევანი ბევრია. GOT-ის ნახვა დღეს ყველას შეგვეძლება. ასე რომ, მოემზადეთ, რამდენიმე საათში ზამთარი დადგება.