რუმინეთის შავი ზღვის სანაპიროზე ზღვამ პაკეტებში დაფასოებული, დაახლოებით, 130 კილოგრამი კოკაინი გამორიყა. კოკაინის აღმოჩენის შემდეგ რუმინეთის პოლიციამ მასშტაბური ანტინარკოტიკული ოპერაცია დაიწყო. ინფორმაციას ამის შესახებ BBC ავრცელებს.

ამ დროისთვის ოპერაციაში პოლიციის სამასამდე ოფიცერი და 14 სანაპირო დაცვის კატარღა მონაწილეობს. დღეს, 8 აპრილის დილიდან ოპერაციაში, ასევე, ჩაერთო ორი ვერტმფრენი და მყვინთავების ჯგუფი. პირველად კოკაინი სამართალდამცავებმა გასულ პარასკევს, 5 აპრილს იპოვეს.

წინასწარი ვარაუდით, კოკაინის წარმომავლობად რუმინეთში წინა კვირაში აღმოჩენილ მიტოვებულ გემს ასახელებენ. სამართალდამცავებმა გემზე ერთი ტონა ნარკოტიკული ნივთიერება აღმოაჩინეს. ინციდენტთან დაკავშირებით რუმინეთის პოლიციამ სერბეთის ორი მოქალაქე დააპატიმრა.

ადგილობრივი ტელევიზიის Digi24-ის ცნობით, ანტინარკოტიკული ოპერაცია სანაპირო ხაზის 90-კილომეტრიან მონაკვეთზე მიმდინარეობს. ადგილობრივი პოლიციის მაღალჩინოსანმა, ჯორდან დრაგანმა მოსახლეობას მოუწოდა, რომ პაკეტის პოვნის შემთხვევაში არ გაეხსნათ და ნარკოტიკული ნივთიერება არ მოეხმარათ. დრაგანის ინფორმაციით, კოკაინის სისუფთავე 90 პროცენტს აღემატება და მისი მოხმარება სიცოცხლისთვის საშიშია.

მიიჩნევა, რომ რუმინეთზე სამხრეთ ამერიკული ნარკოტრაფიკის მნიშვნელოვანი მონაკვეთი გადის. 2016 წელს რუმინეთის პოლიციამ, პანამის დროშის ქვეშ მცურავ გემზე 2,5 ტონა კოკაინი აღმოაჩინა. მაშინ ამოღებული კოკაინის ღირებულება 600 მილიონ ევროს გაუტოლდა. კოკაინი ბანანის კონტეინერებში იყო დამალული და ნიდერლანდებისკენ მიემართებოდა.