ჩანაცვლების თერაპიაში მონაწილე პაციენტები ავტომობილის მართვის შემთხვევაში დაისჯებიან. ეს იმ კანონიდან გამომდინარეობს, რომელიც შინაგან საქმეთა სამინისტროს ინიცირებულია და საქართველოს პარლამენტმა მიიღო. შინაგან საქმეთა სამინისტროში On.ge-ს განუცხადეს, რომ კანონი ვრცელდება ყველა ადამიანზე.

არც შსს-მ და არც პარლამენტმა არ გაითვალისწინა ის რამდენიმე ათასი ადამიანი, რომელიც ამ პროგრამის საშუალებით ცდილობს ნარკოდამოკიდებულება დაძლიოს. კანონი ერთი კვირაა ამოქმედდა.

დღეს, 6 აპრილს ამ მიზეზით მთავრობის ადმინისტრაციასთან აქცია გაიმართა. აქციის ორგანიზატორები ნარკოტიკების მომხმარებელთა საქართველოს ქსელი, ზიანის შემცირების საქართველოს ქსელისა და ჩანაცვლებითი თერაპიის პაციენტები იყვნენ. ისინი მოითხოვენ, ჩანაცვლების მიზნით ექიმის დანიშნულებით მოიხმარენ კონკრეტულ მედიკამენტებს მარიხუანას, მეტადონსა და სუბოქსინს რეგულაცია არ შეეხოს.

"ამ პროგრამას მხარს უჭერს ხელისუფლება, ფულს ხარჯავს, მაგრამ ამ პროგრამის უმთავრეს დანიშნულებას — ადამიანის რესოციალიზაციას, პირდაპირ ეწინააღმდეგება. ხელისუფლება ამ გადაწყვეტილებით ამ ადამიანებს უსპობს შესაძლებლობას არსებობის შესაძლებლობას", — განუცხადა On.ge-ს ახალი ვექტორის დირექტორმა და ნარკოტიკების მომხმარებელთა ქსელის წარმომადგენელმა, კოკა ლაბარტყავამ.

ის არ გაამორიცხავს, რომ თუ პოლიციელი გაარკვევს, რომ პირი მეტადონის პროგრამაში მონაწილეობს, დამატებით ტესტირების ჩასატარებლად გადაიყვანონ.

2019 წლის პირველი აპრილიდან სატრანსპორტო საშუალების მძღოლებს ნარკოტიკული ნივთიერების ზემოქმედებაზე ამოწმებენ. ძალაში შევიდა სისხლის სამართლის კოდექსის 276-ე მუხლი. კანონში შესული ცვლილებით, ნარკოტიკული ნივთიერების ზემოქმედების ქვეშ მანქანის მართვისთვის გათვალისწინებულია ჯარიმა, ან ერთ წლამდე თავისუფლების აღკვეთა. ასევე, სამი წლის ვადით სხვადასხვა უფლებების, მათ შორის, სატრანსპორტო საშუალების მართვის უფლების ჩამორთმევა.