უკრაინელი მფრინავის, ნადეჟდა სავჩენკოს ადვოკატის, ნიკოლაი პოლოზოვის განმარტებით, უკრაინა ვალდებულია რუსული სასამართლოს მიერ სავჩენკოსათვის გამოტანილი განაჩენი აღიაროს, თუმცა ვალდებული არ არის აღასრულოს ის. ამის შესახებ ინფორმაციას Ria.ru დღეს, 4 მაისს, ავრცელებს.

პოლოზოვის თქმით, 1983 წლის კონვენციის თანახმად, უკრაინამ უნდა აღიაროს რუსული სასამართლოს განაჩენი იმისთვის, რომ შემდგომში სავჩენკოს ექსტრადირებასთან დაკავშირებული დოკუმენტაცია, რუსულმა სასამართლომ განიხილოს:

"თუმცა, სავჩენკოს სამშობლოსთვის გადაცემის შემთხვევაში, ხელისუფლებას უფლება აქვს ის შეიწყალოს ან ამნისტიით გამოუშვას ციხიდან. აღნიშნული ამავე კონვენციის შესაბამისი ნორმებით იქნება გამართლებული".

დღეს რუსეთის სასჯელაღსრულების ფედერალურმა სამსახურმა სავჩენკოს უკრაინისთვის გადაცემასთან დაკავშირებული დოკუმენტაციის შეგროვება დაიწყო. უწყების განცხადებით, აღნიშნულ დოკუმენტაციას სასამართლოს მხოლოდ იმ შემთხვევაში გადასცემენ, თუ უკრაინის მხარე რუსული სასამართლოს მიერ გამოტანილ განაჩენს მთლიანად აღასრულებს.

რუსულმა მხარემ ნადეჟდა სავჩენკო 2014 წელს წელს დააკავა და ბრალად რუსი ჟურნალისტების, იგორ კორნელიუკისა და ანტონ ვოლოსინის, მკვლელობა დასდო. ამ დროის განმავლობაში სავჩენკო ბრალდებას უარყოფს და ამტკიცებს, რომ მის ირგვლივ განვითარებული პროცესებს პოლიტიკური სარჩული აქვს. მისი განმარტებით, 2014 წლის ივნისში აღმოსავლეთ უკრაინაში მას შემდეგ შეიპყრეს, რაც რუსი ჟურნალისტები უკვე დახოცილები იყვნენ.

რუსულმა მხარემ სავჩენკო დამნაშავედ ცნო და 22 წლიანი პატიმრობა მიუსაჯა.