შინაგან საქმეთა სამინისტროს განცხადებით, ჯგუფურად ჩადენილი ძალადობის ბრალდებით, სამი პირია დაკავებული. უწყების ცნობით, დაკავებულებმა რუსთავში, მე-15 მიკრორაიონში მდებარე ერთ-ერთი მაღაზიის გამყიდველს ფიზიკური და სიტყვიერი შეურაცხყოფა მიაყენეს.

შსს-ს ინფორმაციით, ინციდენტის დღეს, მაღაზიის გამყიდველმა მათ უარი უთხრა პროდუქტის "ნისიად" მიცემაზე. ამას ბრალდებულების მხრიდან მოჰყვა აგრესია. მათ სიტყვიერი და ფიზიკური შეურაცხყოფა მიაყენეს სავაჭრო ობიექტის თანამშრომელს. დაშავებული პირი სამედიცინო კლინიკაში გადაიყვანეს, მის ჯანმრთელობას საფრთხე არ ემუქრება. უწყების ინფორმაციით, მანამდე ბრალდებულებმა რამდენჯერმე, თანხის მოგვიანებით გადახდის პირობით, აიღეს სხვადასხვა პროდუქტი.

გამოძიება ჯგუფურად ჩადენილ ძალადობის ფაქტზე, საქართველოს სსკ-ს 126¹ მუხლის ბ ქვეპუნქტით მიმდინარეობს. დანაშაული 2 წლამდე ვადით თავისუფლების აღკვეთას ითვალისწინებს.