სამეფო კარის თამაშების ფინალური სეზონის მოსვლამდე ცოტა დრო რჩება. მაყურებელმა ისედაც იცის, რომ წინ ძალიან მძიმე სანახაობა ელის, თუმცა HBO რის HBO იქნებოდა, ცეცხლზე ნავთი რომ არ დაესხა და კიდევ უფრო არ გაემწვავებინა ჩვენი ისედაც საშინელი მდგომარეობა.

თანაც, ყველაფერი ნელ-ნელა შემოგვაპარეს და ჭრილობაზე სულ უფრო მეტი მარილი მოგვაყარეს.

მაგალითად, გუშინ არხმა სერიალის ისტორიაში ერთ-ერთი ყველაზე ტრაგიკული და გულისმომკვლელი პრომო გაავრცელა. ერთ წუთიანი ტიზერი ფაქტობრივად გვიანონსებს, რომ ვინტერფელი ღამის მეფის არმიამ აიღო და დიდი ალბათობით არია, ჯონ სნოუ, ჯეიმი და ტირიონი გაანადგურეს.

ეს არ იკმარეს და ახლა ფინალური სეზონის ახალი პოსტერიც შემოგვთავაზეს. თანაც, არც მეტი, არც ნაკლები გვამებისგან "აწყობილი" რკინის ტახტი.

ფოტო: HBO

თუ პოსტერს დავუჯერებთ (და იმედია არ უნდა დავუჯეროთ) ყველაფერი გასაგები ხდება - რკინის ტახტისთვის ბრძოლას ყველა პერსონაჟი ეწირება. სერსეი ლანისტერით დაწყებული და დეინერის ტარგარიენით დამთავრებული.

ასეა თუ ისე, ერთადერთი რაც დაგვრჩენია არის ის, რომ ეს პოსტერი გავადიდოთ და ვიმკითხაოთ ვინ ჩანს და ვინ არა ფოტოზე. სხვა ყველაფერს ფარდა კი 14 აპრილიდან აეხდება.