ინგლისელი მსახიობი და კომიკოსი ჯეიმს კორდენი ამბობს, რომ პუტკუნა მსახიობები რომანტიკულ როლებს ვერ იღებენ.

კორდენმა ტელევიზიისა და კინოინდუსტრიის შერჩევითი დამოკიდებულება დევიდ ტენანტის პოდკასტში გააკრიტიკა და დასძინა:

"თუ პუტკუნა ხარ, მაშინ არასდროს არავინ გიყვარდება, არასდროს გაქვს სექსი. არავის იზიდავ".

კორდენის თქმით, შედარებით დიდი ზომის მსახიობებისთვის განკუთვნილია "მიმზიდველი" პერსონაჟის მეგობრების როლები, რომლებიც აუცილებლად კეთილები და მხიარულები არიან.

ჯეიმს კორდენი The History Boys-ში

ფოტო: BBC

"The History Boys-ში ვთამაშობდი და იქ ჩემ გარდა შვიდი ბიჭი მსახიობი იყო, იგივე ასაკითა და ერთნაირი კარიერული მიღწევებით. თითქმის ყოველდღე 3-4 მათგანი დიდი სცენარებით ბრუნდებოდა, მე კი მხოლოდ ორი გვერდი და ფილმის დასაწყისში ნიუსაგენტის როლი მერგო".

კორდენის თქმით, ის გრძნობდა, თითქოს გარშემომყოფები ეუბნებოდნენ, რომ ის ნიჭიერი ჩანდა, თუმცა პრობლემა მის გარეგნობაში იყო.

"უცხოპლანეტელმა რომ დედამიწის შესასწავლად მხოლოდ ფილმებსა და ტელესერიალებს უყუროს, იფიქრებს, რომ თუ მსუქანი ან ცოტა პუტკუნა ხარ, არასდროს არავინ გიყვარდება და არც სექსი გაქვს.

წონის გამო, არავინ მიგიჩნევს სიმპათიურად. შენ იქნები მიმზიდველი ადამიანების კარგი მეგობარი, რომელიც რთულ სიტუაციებში მათ ძველი ხუმრობებით ამხნევებს.

ისეთი შეგრძნება მაქვს, თითქოს გასართობი ინდუსტრია წვეულების ერთი დიდი მაგიდაა, სადაც ადამიანები განიშნებენ, რომ მათ გვერდით შენი ადგილი არაა".

ჯეიმს კორდენი ცოლთან, ჯულია კერთან ერთად ოსკარის შემდგომ გამართულ წვეულებაზე

ფოტო: Getty Images

მისი თქმით, მთავარი როლებიდან გამოყოფის გამო, გადაწყვიტა რომ თავად დაეწერა 2007 წლის სიტკომი Gavin & Stacey. ახლა მას CBS-ზე საკუთარი შოუ The Late Late Show აქვს.

ეს პირველი შემთხვევა არაა, როცა კორდენმა ჭარბწონიანების მიმართ ჰოლივუდის უსამართლო დამოკიდებულება გააკრიტიკა.

"ვერასდროს ვუგებდი რომანტიკულ კომედიებს. მათ თუ დავუჯერებთ, მსუქანი ან შეუხედავი ადამიანები სიყვარულს არ იმსახურებენ", - თქვა მან Rolling Stone-თან ინტერვიუში 2016 წელს.