დიდი ბრიტანეთის მთავრობამ თურქეთის დედაქალაქ ანკარაში უსაფრთხოების მიზნით, საელჩო დროებით, ერთი დღით დახურა. ამის შესახებ ბრიტანეთის საგარეო უწყებამ საკუთარ ვებ გვერდზე განცხადება გამოაქვეყნა:

"ბრიტანეთის საელჩო ანკარაში დაიხურება 16 სექტემბერს, პარასკევს, უსაფრთხოების გამო".

საგარეო უწყება მოუწოდებს საკუთარ მოქალაქეებს, რომ არ იმოგზაურონ სირიის საზღვრიდან სამხრეთ აღმოსავლეთით მდებარე ქალაქ დიარბაკირამდე 10კმ-ის ფარგლებში. აღნიშნულ ტერიტორიაზე, ჯერ კიდევ გრძელდება ბრძოლა მას შემდეგ რაც, ერთი წლის წინ, მთავრობასა და ქურთების მუშათა პარტიას შორის ცეცხლის შეწყვეტის შეთანხმება დაირღვა.

თურქეთი უკვე ბევრჯერ გახდა ისლამისტი ექსტრემისტების სამიზნე. გარდა ამისა 2016 წლის ივლისში მომხდარი სახელმწიფო გადატრიალების მცდელობამ ხელი შეუწყო ქვეყნის დესტაბილიზაციას.

ბრიტანეთის საგარეო უწყების ცნობით, წელიწადში 2 500 000-ზე მეტი ბრიტანელი ჩადის თურქეთში:

"ზოგადად მოგზაურობა უსაფრთხოა მაგრამ საჭიროა დაიცვათ დამატებითი უსაფრთხოების ზომები. უნდა იყოთ მზადყოფნაში და ფხიზლად, განსაკუთრებით ხალხმრავალ ტურისტულ ადგილებში".

ბრიტანეთის მთავრობამ გაავრცელა თურქეთის რუკა, იმ აღნიშვნებით თუ სად არ შეიძლება მოგზაურობა და ტერიტორია სადაც ჩასვლამდე უნდა გაეცნო სპეციალურ რჩევებს.

ფოტო: The Foreign and Commonwealth Office Of UK