თბილისის მეტროს გოცირიძის მეტროსადგურის რეაბილიტაციისთვის გამოცხადებულ ტენდერში გამარჯვებული მესამედ ვერ გამოვლინდა. მეტროსადგურის არაერთი დაზიანება აქვს, რომელიც ექსპერტიზის დასკვნით არის დადასტურებული. დასკვნა სატენდერო დოკუმენტებშია ატვირთული.

კვლევის შედეგები

ფოტო: შპს მდგრადობის ექსპერტი

რამდენიმე დეტალი კვლევიდან:

  • დასკვნაში ვკითხულობთ, რომ ნალექების ზემოქმედებით დაზიანებულია პორტალის ცალკეული უბნები, ხოლო ერთ-ერთ უბანზე, კოროზიის გამო მოგლეჯილია ბეტონის დამცავი შრის დაახლოებით 0,5 მეტრის სიგრძის მონაკვეთი;
  • ცალკეულ უბნებში დაწყებულია ბეტონის გამოტუტვის პროცესი, გაშიშვლებულია მუშა არმატურა და დაწყებულია კოროზიის პროცესი;
  • დაზიანებულია გადამტიხრავი, არამზიდი კედლებიც, მათში გაჩენილია 3-5 მმ გახსნილობისა და 3-5 მ სიგრძის დამახასიათებელი დაჭრილი, გამჭოლი ბზარები.

კვლევაში კონსტრუქციული დეფექტებიდან ყველაზე მეტ ყურადღებას ბეტონის დაყალიბების ხარვეზებზე ამახვილებენ. დოკუმენტში ნათქვამია, რომ გადაჭარბებული ფორიანობისა და ნიჟარების გამო ატმოსფერული ნალექები ბეტონის გავლით ადვილად აღწევს არმატურამდე და იწვევს მის კოროზიას. ამ მიზეზით არმატურა იზრდება მოცულობაში, რაც აზიანებს დამცავ შრეს და ცალკეულ შემთხვევაში მოგლეჯვასაც კი იწვევს.

"სავარაუდოდ, ნაგებობას დროულად ან სათანადოდ არ უტარდებოდა მიმდინარე, თუ კაპიტალური რემონტები, რის გამოც, მწყობრიდან გამოსული ჰიდროსაიზოლაციო მასალების გავლით ატმოსფერული ნალექები ადვილად აღწევდა მზიდ კონსტრუქციებამდე და იწვევდნენ მათ ზემოთ აღნიშნულ დაზიანებას", — ვკითხულობთ კვლევაში.

თბილისის სატრანსპორტო კომპანიაში On.ge-ს განუცხადეს, რომ ამ მეტროსადგურით მგზავრობა "იმდენად უსაფრთხოა, რომ გამაგრებით სამუშაოებსა არ გეგმავენ".

თბილისის სატრანსპორტო კომპანია ამ დრომდე მეტროსადგურის შეკეთებაში 2 045 650 ლარის გადახდას გეგმავდა. ორ შემთხვევაში ტენდერი არ შედგა (არავინ მიიღო მონაწილეობა), ერთ შემთხვევაში კი მონაწილე კომპანიას დისკვალიფიკაცია მიენიჭა.