"ბოღმა არ ვარ და ასეთი რაღაცები არ მახსოვს", — ასე პასუხობს უმრავლესობის დეპუტატი ზაზა პაპუაშვილი კითხვას, იყო თუ არა ქართული ოცნებიდან გასარიცხთა სიაში. უმრავლესობიდან წამოსული დეპუტატის, გედევან ფოფხაძის თქმით, ე.წ. შავი სიაში, რომელიც ირაკლი კობახიძემ ბიძინა ივანიშვილს გადასცა, ის, პაპუაშვილი და კიდევ ოთხი ადამიანი იყვნენ.

"თუ მრიცხავდნენ და მე არ მახსოვს, ან მრიცხავდნენ და მე ვერ გავიხსენე, არ ვიცი. ცუდი მახსოვრობა არ მაქვს, მაგრამ არ ვიცი, ამოვარდა, გადავარდა", — ამბობს პაპუაშვილი On.ge-სთან საუბრისას.

მისი თქმით, ახლა კობახიძესთან ინტენსიური ურთიერთობა არ აქვს. ის ამბობს, რომ გარკვეულ საკითხებში მას და პარლამენტის თავმჯდომარეს განსხვავებული მოსაზრებები აქვთ.

"ზუსტად რაზე ვლაპარაკობდით კარგად არ მახსოვს, მინდა გედი ვნახო, დაველაპარაკო, აღვიდგინო ყველაფერი და დავალაგო. რაღაც მოხდა, გაუგებრობა და მაგაზე შევიკრიბეთ, ქუთაისში მოხდა სააქტო დარბაზში პატარა წალაპარაკება, მე მგონი ეგ იყო და მერე მეც ჩავერიე და ჩემი აზრი ვთქვი. დავალაგებ რა, რაღაცებს გავახსენებთ ერთმანეთს", — ამბობს პაპუაშვილი.

გედევან ფოფხაძე, რომელმაც პირველმა გააჟღერა ე.წ. შავი სიის შესახებ ინფორმაცია, ამტკიცებს, რომ ამ სიაში ნუკრი ქანთარია, ლევან პაპუაშვილი, ლევან კობერიძე, რომან კაკულია და დავით ჭიჭინაძეც იყვნენ. ჭიჭინაძე ფოფხაძის მსგავსად უმრავლესობის წევრი აღარაა.