ჯანდაცვის მინისტრმა დავით სერგეენკომ სოციალური მუშაკების პროტესტთან დაკავშირებით თქვა, რომ მაშინ როცა კანონის აღსრულების გეგმის წერაზე იყვნენ კონცენტრირებული, "სამინისტროში მომენტი გაექცათ". სერგეენკო ამბობს, რომ სოციალური მუშაკები მთელი ამ პერიოდის განმავლობაში და იქამდეც მძიმე მდგომარეობაში იყვნენ, ჰქონდათ ბევრი სამუშაო და იყვნენ რთული გადაწყვეტილებების მიღებისა და აღსრულების პროცესში.

"გეგმის პირველი ნაწილი ამ ტვირთისგან მათი განტვირთვაა, ჩამოშორება ისეთი საქმეების, რაც მათ პრობლემებს უქმნის და ეს უკვე დაწყებულია. მეორე ნაწილია პროფესიული მხარდაჭერა, რომ ისინი ერთი ერთზე აღარ იყვნენ პრობლემების პირისპირ. ესეც შესრულებულია. მესამე არის ტექნიკური მხარდაჭერა, ტრანსპორტზე იყო აქცენტირება. სანამ გაფიცვა დაიწყებოდა, ყველა რეგიონში თითო მანქანა გამოიყო და თბილისში ორი. უახლოეს ერთ კვირაში გვექნება + 11 მანქანა", — ამბობს ჯანდაცვის მინისტრი.

სოციალურმა მუშაკებმა გაფიცვის შესახებ ჯანდაცვის სამინისტროს 21 მარტს აცნობეს, რასაც წინ თვენახევრიანი უშედეგო მედიაცია უძღოდა. მედიაციის პროცესი სოციალურ მუშაკებსა და სამინისტროს შორის თებერვალში დაიწყო. სოციალური მუშაკები ამბობენ, რომ წლების წინ ბავშვთა ზრუნვის სისტემის წარმატებით დაწყებული რეფორმა ვეღარ ფუნქციონირებს და ბავშვთა საუკეთესო ინტერესებს მორგებული არაა.

თამარ ბარკალაიას თქმით, მედიაციის პროცესში რამდენიმე სამუშაო შეხვედრა გაიმართა და სხვადასხვა ხანგრძლივობის სამუშაო გეგმა გაიწერა. როგორც ის ამბობს, პრობლემების ნაწილი უკვე მოგვარებულია.

"ტრანსპორტირების ნაწილი მოგვარებულია, ანუ გადანაწილებულია მანქანები, დამატებითი მანქანების მოთხოვნებიც არის. არის ინფრასტრუქტურული საჭიროებები და ცალკე ოთახები მოთხოვნილი სოციალური მუშაკების მიერ, რომელიც შეფასებულია და ტენდერი უახლოეს მომავალში გამოცხადდება. არის მეთოდოლოგიური საკითხები, რომელთა მოგვარებაც უკვე დაწყებულია", — აღნიშნა მინისტრის მოადგილემ.

25 მარტს სოციალურმა მუშაკებმა მთავრობის კანცელარიის წინ საპროტესტო აქცია გამართეს. მათ სამუშაო პირობების გაუმჯობესება და ბენეფიციარებისთვის ეფექტიანი და მყისიერი მომსახურებების შექმნა მოითხოვეს. მათივე თქმით, გაფიცვით პროფესიისა და ბენეფიციარების დაცვას ცდილობენ.

ამავე თემაზე: სოციალური მუშაკი — პროფესია, რომლის მნიშვნელობასაც სისტემა ვერ ხვდება