ბრტყელი დედამიწის ყოველწლიური კონფერენციის ორგანიზატორებს ახალი იდეა აქვთ, ამჟამად ისინი 2020 წლისთვის კრუიზს გეგმავენ, რომლითაც დედამიწის გარშემო არსებული გიგანტური ყინულის კედელი უნდა აღმოაჩინონ.

ბრტყელი დედამიწის საერთაშორისო კონფერენციის, FEIC-ის თანახმად, მოგზაურობა 2020 წელს დაიწყება. კრუიზის მიზანი იმის დამტკიცებაა, რომ ბრტყელი დედამიწა ყინულის დიდი კედლითაა შემოსაზღვრული.

ღონისძიების დეტალები და ზუსტი თარიღი, მათივე თქმით, მალე გამოქვეყნდება. კრუიზი ამ დრომდე მათ მიერ განხორციელებული ყველაზე დიდი და ყველაზე გაბედული მოგზაურობა იქნება. ამ თეორიის მიმდევრები ამტკიცებენ, რომ ფოტოები, რომლებზეც მომრგვალო, მრუდი ჰორიზონტია ასახული, ნასას მიერ შექმნილი ერთ-ერთი კონსპირაციაა.

ბრტყელი დედამიწის საზოგადოების (FES) ვებგვერდზე კიდევ მრავალ მსგავს მოსაზრებას წააწყდებით. როგორც ისინი ამბობენ, FES ბრტყელი დედამიწის მომხრეების გამაერთიანებელი ყველაზე ძველი ორგანიზაციაა და ის ჯერ კიდევ 1800-იან წლებში ჩამოყალიბდა.

აღსანიშნავია, რომ ძველმა ბერძნებმა ჯერ კიდევ 2 000 წლის წინ მოახდინეს იმის დემონსტრირება, რომ მიზიდულობის ძალა, რომელიც ყველა მატერიას პლანეტაზე აკავებს, მხოლოდ სფერული ფორმის სხეულზე შეიძლება არსებობდეს.

ბრტყელი დედამიწის მიმდევრები FEIS-ის საიტზე სხვადასხვა დიაგრამებს აქვეყნებენ. მათზე ჩანს ბლინის ფორმის დედამიწა, რომლის ცენტრშიც ჩრდილოეთ პოლუსია, დედამიწის კიდეები კი გიგანტური ყინულოვანი კედლითაა შემოსაზღვრული.

ამის მიუხედავად, ბრტყელი დედამიწის მიმდევრებს ჯერჯერობით დიდი წინააღმდეგობა აქვთ დასაძლევი. 23-წლიანი გამოცდილების მქონე კაპიტანი ჰენკ კეიჯერი The Guardian-თან აცხადებს, რომ ნებისმიერი ნავიგაციური სქემა და სისტემა, რომელიც გემებს მეგზურობას უწევს სფერული დედამიწის პრინციპზეა დაფუძნებული.

მაგალითად, GPS-ის სერვისს ათეულობით თანამგზავრი განაპირობებს, რომლებიც დედამიწიდან ათასობით კილომეტრის სიშორეზე იმყოფებიან. ადგილმდებარეობის დასადგენად საჭიროა, რომ GPS-ის მოწყობილობას მინიმუმ სამი თანამგზავრი უკავშირდებოდეს.

"დედამიწა რომ ბრტყელი იყოს, მხოლოდ სამი თანამგზავრი მთელი დედამიწის დაფარვას მოახერხებდა, თუმცა ეს ასე არ არის, დედამიწა მრგვალია და ამის გამო ამჟამად ორბიტაზე დაახლოებით 24 GPS თანამგზავრია",- აცხადებს კეიჯერი.

ჯერჯერობით უცნობია, მოგზაურობის დროს ბრტყელი დედამიწის მომხრეები მრგვალ დედამიწაზე მორგებულ GPS-ს მიენდობიან თუ კრუიზისთვის რაიმე ახალ სანავიგაციო სისტემას მოიგონებენ.