საპენსიო სააგენტოს დირექტორი ლევან სურგულაძე დარწმუნებულია, რომ საპენსიო ფონდის გაკოტრება გამორიცხულია. ამის შესახებ მან ტოკ-შოუ არჩევანში განაცხადა.

ლევან სურგულაძის თქმით, თანხას, რომელსაც მოქალაქეები აგროვებენ, ვერ შეეხება ვერავინ, მათ შორის, სასამართლოც.

"ეს ფონდი არის დაგროვებითი საპენსიო ფონდი. ანუ, თქვენ, პრაქტიკულად, ინდივიდუალურ საპენსიო ანგარიშზე გერიცხებათ თანხა. ეს ფული უკვე თქვენია, თქვენი პირადი და ხელშეუხებელი და უპირობო საკუთრებაა და დაცულია უფრო მეტად, ვიდრე თქვენი ნებისმიერი სხვა საკუთრება, ისეთი, როგორიც არის სახლი, მანქანა, გნებავთ ფული ბანკში იმიტომ, რომ ამ თქვენს აქტივებზე არ ვრცელდება არანაირი აღსრულების მექანიზმი. ვისი ვალიც არ უნდა გქონდეთ თქვენ, ამ თქვენს დანაზოგს ვერავინ შეეხება, მათ შორის, სასამართლოც", — განაცხადა ლევან სურგულაძემ.

ლევან სურგულაძე აცხადებს, რომ საპენსიო ფონდში დაგროვილი თანხით მოსახლეობა უფრო მეტ სარგებელს ნახავს, ვიდრე ბანკში გაკეთებული დანაზოგით.

"საპენსიო ფონდის გაკოტრება არის გამორიცხული, იმიტომ, რომ ინვესტირება ხდება მაღალი დონის პროფესიონალების მიერ. ეს იქნება დივერსიფიცირებული ფონდი. გამოცხადებული გვაქვს საინვესტიციო საბჭოს წევრობაზე ვაკანსიები, იქნებიან მაღალი რანგის პროფესიონალები, დიდი გამოცდილებით ამ სფეროში და ასევე შევარჩევთ უფროს საინვესტიციო ოფიცერს, რომელიც უშუალოდ განახორციელებს საინვესტიციო პროცესს", — ამბობს სურგულაძე.

საპენსიო სააგენტომ საინვესტიციო საბჭოს წევრობაზე ვაკანსია 23 მარტს გამოაცხადა. როგორც ვაკანსიის ტექსტშია აღნიშნული, საბჭოს წევრის წლიური მინიმალური ხელფასი $60 ათასი იქნება, ამას ემატება სამგზავრო ხარჯები. საინვესტიციო საბჭოში ხუთი წევრი იქნება, შესაბამისად წელიწადში მათი ხელფასისთვის მინიმუმ $300 ათასია გათვალისწინებული. საბჭოს წევრს ხუთწლიანი ვადით ირჩევენ.

დაგროვებითი პენსია

დაგროვებითი საპენსიო სისტემა 2019 წლის იანვრიდან ამოქმედდა. 40 წლამდე დასაქმებული მოქალაქეებისთვის სქემაში ჩართვა სავალდებულოა. დასაქმებულის საპენსიო ანგარიშზე ყოველთვიურად დაუბეგრავი ხელფასის 6 პროცენტი გროვდება. კანონის მიხედვით, 2 პროცენტი დასაქმებულის ხელფასიდან აკლდება, 2 პროცენტს დამსაქმებელი იხდის, დარჩენილი 2 პროცენტს კი — სახელმწიფო.

სააგენტოს ხელმძღვანელი 50 წლის ლევან სურგულაძეა. შესაბამისად, მას ამ სქემაში ჩართვის ვალდებულება არ აქვს. მისი ხელფასი კი 15 ათასი ლარია.

გაიგე მეტი: რა უნდა ვიცოდეთ დაგროვებით საპენსიო სისტემაზე — მოკლედ