ნატოს გენერალურმა მდივანმა, იენს სტოლტენბერგმა საქართველოს პრემიერ-მინისტრთან, მამუკა ბახტაძესთან ერთობლივ პრესკონფერენციაზე თქვა, რომ საქართველომ უნდა გადაწყვიტოს, რომელ სამხედრო ალიანსში გაწევრიანდება და რუსეთი ან სხვა მეზობელი ქვეყანა ამაში ვერ ჩაერევა. ამის შესახებ სტოლტენბერგმა საზოგადოებრივი მაუწყებლის ჟურნალისტის კითხვაზე საპასუხოდ განაცხადა, რომელიც საქართველოს ნატოში გაწევრიანებაზე რუსეთის წინააღმდეგობას ეხებოდა.

"საქართველოს ჩრდილოეთით მეზობლობა, რა თქმა უნდა, გასაგებია, მაგრამ ნორვეგიაც არის მსგავს სამეზობლოში... 1949 წელს გახდა ნორვეგია ნატოს წევრი, სტალინს არ მოეწონა ეს ფაქტი, მაგრამ ალიანსის წევრი ქვეყნები ამბობდნენ, რომ სტალინის ნებას კიარ მივყვებით, არამედ შეთანხმებულად ვმოქმედებთ, იგივე მოხდება საქართველოს შემთხვევაშიც", — თქვა სტოლტენბერგმა.

მისივე განცხადებით, ალიანსის ყველა წევრი თანხმდება, რომ საქართველო ნატოს წევრი გახდება, შესაბამისად, ეს ალიანსის გარეთ მყოფი რომელიმე ქვეყნის გადასაწყვეტი არ არის და მხოლოდ ალიანსის წევრ 29 ქვეყანას და თავად საქართველოს ეხება.

ეს პირველი შემთხვევა არ არის, როცა სტოლტენბერგი მსგავს მესიჯს აჟღერებს. მან 2019 წლის 18 ივლისს, ბრიუსელში პრემიერ მამუკა ბახტაძესთან ერთად გამართულ პრესკონფერენციაზე თქვა, რომ რუსეთს არ აქვს უფლება, გადაწყვიტოს საქართველოს ნატოში ინტეგრაციის საკითხი. იგივე თქვა უფრო ადრეც, 2017 წლის 8 ივნისს გამოცემა Le Figaro-სთან ინტერვიუში. სტოლტენბერგმა განმარტა, რომ საქართველოს ნატო-ში გაწევრიანებას რუსეთი ხელს ვერ შეუშლის.