"რუსეთს არ აქვს უფლება გადაწყვიტოს რაიმე მეზობლების სახელით, რადგანაც საქართველო არის სუვერენული, დამოუკიდებელი სახელმწიფო", - ამის შესახებ ნატოს გენერალურმა მდივანმა იენს სტოლტენბერგმა დღეს, ბრიუსელში პრემიერ მამუკა ბახტაძესთან ერთად გამართულ პრესკონფერენციაზე განაცხადა. ნატოს გენმდივანმა რუსთავი 2-ის ჟურნალისტის კითხვის პასუხად შეაფასა რუსეთის პრეზიდენტის, ვლადიმერ პუტინის განცხადება, საქართველოს ნატოში ინტეგრაციაზე.

"ნატოს ინფრასტრუქტურის ჩვენს საზღვრებთან გადაადგილება საფრთხეა და ამაზე ჩვენი რეაქცია იქნება უკიდურესად ნეგატიური", - ასე უპასუხა რუსეთის პრეზიდენტმა, ვლადიმერ პუტინმა, Fox News-ის წამყვანს, კრის ვოლასს, უკრაინისა და საქართველოს ნატოში გაწევრიანების შესახებ დასმულ კითხვაზე.

იენს სტოლტენბერგმა პუტინის ნათქვამს "პროვოკაციული მუქარა" უწოდა და თქვა, რომ ეს აბსოლუტურად არასწორია:

"დიდმა სახელმწიფოებმა უნდა გააცნობიერონ, რომ მათ არ შეუძლიათ უბრძანონ რაიმე პატარა სახელმწიფოს. საქართველო და ნატოს 29 ქვეყანა თავად გადაწყვეტენ, როდის გახდება ის წევრი, რუსეთს ამასთან არაფერი ესაქმება. 29-ვე ქვეყნის მეთაურმა განაცხადა, რომ გაგრძელდება მხარდაჭრა, მათ შორის პოლიტიკური".

იენს სტოლტენბერგის თქმით, მიუღებელია რუსეთის ამგვარი ხედვა. ნატოს გენერალური მდივანი ამბობს, რომ რუსეთი ცდილობს თავისი ძველი გავლენის სფეროები აღადგინოს:

"დიდმა სახელმწიფოებმა უნდა გადასინჯონ თავიანთი პოზიციები. ნორვეგია, პატარა სახელმწიფო, როდესაც შეუერთდა ნატოს, 1949 წელს, არასოდეს არ შევეგუებოდი იმას, რომ საბჭოთა კავშირს ეკარნახა, თუ რისი უფლება ჰქოდნა ნატოს და რისი - არა".

ჰელსინკის სამიტის შემდეგ, 17 ივლისს Fox News-თან ინტერვიუში, ვლადიმერ პუტინმა განაცხადა, რომ უკრაინის ან საქართველოს გაწევრიანება ნატოში პირდაპირი და დაუყოვნებლივი საფრთხეა რუსეთის ეროვნული უსაფრთხოებისთვის.