აჭარის ჯანდაცვის მინისტრის, ზაალ მიქელაძის განცხადებით ბათუმში, რეფერალურ საავადმყოფოში 29 წლის ქალის გარდაცვალების საქმეზე სამედიცინო რეგულირების სააგენტო მოკვლევას იწყებს. მინისტრის თქმით, ოჯახის მოთხოვნის საფუძველზე ერთმა ექიმმა უფლებამოსილება შეიჩერა.

"გამოძიება ბოლომდე იქნება მიყვანილი და არამხოლოდ ერთი ექიმი, არამედ ყველა ჩართული ადამიანი, რომელსაც ჰქონდა რაიმე გადაცდომა თუ შეცდომა დაშვებული, ყველაზე იქნება ადეკვატური პასუხი", — განაცხადა მინისტრმა აჭარის ტელევიზიასთან საუბრისას.

გარდაცვლილი ქალის ოჯახის წევრები ექიმებს არასწორი დიაგნოზის დასმასა და არასწორ მკურნალობაში ადანაშაულებენ. გუშინ, 23 მარტს ექიმის გათავისუფლების მოთხოვნით მათ საპროტესტო აქცია გამართეს და თავდაპირველად საავადმყოფოს მიმდებარე, შემდეგ კი ქალაქში შესასვლელი ქუჩა გადაკეტეს.

მომხდარზე გამოძიება სისხლის სამართლის კოდექსის 116-ე მუხლით დაიწყო, რაც სიცოცხლის გაუფრთხილებლობით მოსპობას გულისხმობს. ამ მუხლით დანაშაული ისჯება თავისუფლების აღკვეთით ვადით სამიდან ხუთ წლამდე.