თიბისი ბანკის დამფუძნებელი და ანაკლიის კონსორციუმის წევრი მამუკა ხაზარაძე შინაგან საქმეთა მინისტრის გიორგი გახარიას კრიტიკის პასუხად ამბობს, რომ თუ სახელმწიფოს მხრიდან გადავადებებით და შეღავათებით სარგებლობდნენ, ანალოგიურად სახელმწიფოც ითხოვდა თავისი ვალდებულებების გადავადებას. მისი თქმით, შეუძლიათ ეს დოკუმენტურად დაადასტურონ.

"მთელი პასუხისმგებლობით ვაცხადებ, რომ არანაირი ჯარიმა სახელმწიფოს მხრიდან ჩვენ არ მიგვიღია და არავის ეს ჯარიმა არ უპატიებია ჩვენთვის. იმიტომ, რომ ყოველთვის არსებობდა რაღაც ობიექტური მიზეზი და ეს არ იყო ჩვენგან გამოწვეული, იყო უამრავი ფაქტორიდან გამოწვეული", — განაცხადა ხაზარაძემ გადაცემა Forbes-ის კვირაში.

ბიზნესმენი ამბობს, რომ შინაგან საქმეთა მინისტრის დამოკიდებულება არასწორია. მისი თქმით, კრიტიკა ცალმხრივი არ უნდა იყოს. ამასთანავე ხაზარაძე ამბობს, რომ პრივილეგიებით არასდროს უსარგებლია.

"მე ვარ ახლა სახელმწიფო მოხელე, სახელმწიფო ვარ და შენ პატარა ხარ და მე შემიძლია შენზე ვისაუბრო და შენ არ შეგიძლია, ეს არ არის სწორი... მე მთელი პასუხისმგებლობით ვლაპარაკობ, ვერ ნახავთ ვერცერთ კონტრაქტს, რომელიც ჩვენ პირდაპირი წესით მოგვეყიდა და რომელიც ჩვენ ან აუქციონზე, ან კონკურენციის პირობებში არ მოგვიპოვებია", — აცხადებს ხაზარაძე.

მას შემდეგ, რაც მამუკა ხაზარაძემ გიორგი გახარია ზეწოლასა და მუქარაში დაადანაშაულა გახარიამ აღნიშნა, რომ ეს იყო "ერთი პრივილეგირებული ბიზნესმენის მცდელობა პარლამენტის ტრიბუნიდან ჭორაობით იმუნიტეტის მოპოვებისა". შინაგან საქმეთა მინისტრმა მოგვიანებით განმარტა, რომ ეს პრივილეგიები მას მთავრობამ მიანიჭა.

"უბრალოდ, აიღეთ და შეხედეთ. რამდენჯერ იყო, მაგალითად, გარკვეული ვალდებულებების გადავადება მთავრობაზე გადმოტანილი კონკრეტული კომპანიისთვის. რა არის სხვა პრივილეგია?" — განაცხადა მინისტრმა.

ჟურნალისტის კითხვაზე, არის თუ არა ამაში მისი წვლილიც, რადგან ის ეკონომიკის მინისტრი და ბიზნესომბუდსმენი იყო გახარია პასუხობს: "რა თქმა უნდა".