დღეს, 23 მარტს ლივერპულში, ენფილდის სტადიონზე საფეხბურთო კლუბების ლივერპულისა და მილანის ვეტერან ფებურთელებს შორის ამხანაგური მატჩი გაიმართება. ამ შეხვედრაში თბილისის მერი კახა კალაძეც ითამაშებს. მატჩიდან შემოსული თანხა მთლიანად ქველმოქმედებას მოხმარდება.

მილანის ყოფილი მცველი კახა კალაძე ამბობს, რომ სასიამოვნოა წლების შემდეგ იგივე გრძნობის განცდა, რასაც მნიშვნელოვანი თამაშისთვის მზადებისას გრძნობდა.

"მიხარია, რომ ვხვდები ჩემს თანაგუნდელებს, მეგობრებს, რომლებთან ერთადაც 10 წელი გავატარე. ჩემს კარიერას მილანში წარმატებულს დავარქმევდი. რისი მოგებაც შესაძლებელი იყო კლუბის დონეზე, ერთად ყველაფერი მოვიგეთ... დღეს იმართება საქველმოქმედო მატჩი იგივე შემადგენლობით, როგორც 2007 წლის მატჩში. ძალიან კარგი განწყობაა, ყველა ბილეთი გაყიდულია და ვფიქრობ, გულშემატკივარი ისიამოვნებს", —განაცხადა კახა კალაძემ.

შეხვედრაში, ასევე, მონაწილეობას მიიღებენ ფეხბურთის ცნობილი ლეგენდები: პაოლო მალდინი, ალესანდრო ნესტა, კაფუ, ფილიპო ინძაგი, მაიკლ ოუენი, კაკა, ჯემი კარაგერი და სხვები.