კომპანია ალიანს სიტი ბათუმში ცენტრ პოინტის მიერ აშენებული საცხოვრებელი კომპლექსის, თეთრი მაგნოლიას დანგრევასა და ახალი კომპლექსის აშენებას გეგმავს. ამის შესახებ ინფორმაციას საზოგადოებრივი მაუწყებელი ავრცელებს.

კომპანიის არქიტექტორმა, მალხაზ ქათამაძემ ბათუმის მერიაში არასამთავრობო ორგანიზაციებთან შეხვედრაზე თქვა, რომ თეთრი მაგნოლიას დანგრევის გადაწყვეტილება სოციალურ ქსელში მოქალაქეების პოზიციების გაცნობის შემდეგ მიიღეს.

"როგორც ბიზნესკომპანია, მის ნაცვლადაც ვფიქრობთ ახალი არქიტექტურული პროექტის განხორციელებას", — განაცხადა კომპანიის არქიტექტორმა, რომელმაც აქვე აღნიშნა, რომ მოქალაქეები საცხოვრებელ კომპლექსს ყველაზე დიდ სიმახინჯეს უწოდებენ.

თეთრი მაგნოლიას მშენებლობა 2011 წელს დასრულდა. თუმცა, ბათუმის მერიას ამ დრომდე ექსპლუატაციაში არ მიუღია.