ბიბლიური თავისუფლების ინფორმაციით, თავდაცვის კომიტეტის თავმჯდომარე, ირაკლი სესიაშვილი რელიგიური კონფესიების ლიდერებს კულუარულად ელაპარაკება და მათთან გარიგებას ცდილობს. მათივე ცნობით, სესიაშვილი მათ კანონმდებლობის ისეთ მოდელს სთავაზობს, რომლითაც ჯარისგან გათავისუფლების პრივილეგიით ბიბლიური თავისუფლების გარდა ყველა კონფესია ისარგებლებს.

რელიგიური ორგანიზაციის განცხადებით, მათ არ სჯერათ, რომ რომელიმე რელიგიის წარმომადგენელი, რომელსაც რწმენაზე აქვს პრეტენზია და ისედაც ჩაგრულ მდგომარეობაშია, სახელმწიფოსთან ასეთ გარიგებაში შევა.

"თავს ნუ მოიტყუებს ნურცერთი კონფესია, რომ ამ ინიციატივის უკან დგას სესიაშვილი. ყველას კარგად უნდა ესმოდეს რომ ამ კანონპროექტის სულისჩამდგმელი არის საქართველოს მართლმადიდებელი ეკლესიის საპატრიარქო — მათი დისკრიმინაციული ყოფის მთავარი შემოქმედი. შესაბამისად, სესიაშვილთან ასეთ გარიგებაში შესვლა, პირდაპირ ნიშნავს საპატრიარქოს ფეხქვეშ გაგებას და რწმენაზე უარის თქმას", — აცხადებენ ბიბლიურ თავისუფლებაში.

მათივე თქმით, ნებისმიერი რელიგიური ლიდერის მხრიდან ასეთ შეთანხმებაზე თანხმობას ბიბლიური თავისუფლება მიუტევებელ ცოდვად აღიქვამს და ამაზე შესაბამისი პასუხი იქნება.

ირაკლი სესიაშვილის საკანონმდებლო ინიციატივის მიხედვით, არამართლმადიდებელი მღვდელმსახურები სამხედრო სავალდებულო სამსახურის გადავადების უფლებით ვეღარ ისარგებლებენ. მან იდეის გაჟღერებისას განმარტა, რომ ინიციატივა არ გავრცელდება მართლმადიდებელ სასულიერო პირებზე, რადგან მათზე კონკორდატით გათვალისწინებული წესი მოქმედებს.

სესიაშვილმა 2019 წლის 18 მარტს განმარტა, რომ მისი ინიციატივა ყველა რელიგიური კონფესიის წარმომადგენელს ეხება. თუმცა, მისივე თქმით, თუ მართლმადიდებელ მღვდლებს რაიმე სხვა ნორმა იცავს, ეს მის კანონპროექტთან კავშირში არ არის. მეორე დღეს კი ირაკლი სესიაშვილმა თავისი კანონპროექტის განხილვის გადადება ითხოვა.