ყაზახეთის დედაქალაქს ასტანას ყოფილი პრეზიდენტის ნუსრულთან ნაზარბაევის პატივსაცემად დღეიდან, 20 მარტიდან ნურსულთანი ჰქვია. ქვეყნის პარლამენტს ამ ინიციატივაზე ერთი სრული დღეც არ უმსჯელია და მას ერთსულოვნად დაუჭირა მხარი.

ყაზახეთის მთავრობა ითხოვდა, რომ ამ საკითხზე რეფერენდუმი ჩაეტარებინათ, თუმცა ახალმა პრეზიდენტმა გადაწყვიტა, რომ პარლამენტს შეუძლია, სახელის ცვლილება რეფერენდუმის გარეშე განიხილოს.

გუშინ, 19 მარტს, თითქმის 30-წლიანი მმართველობის შემდეგ ყაზახეთის პირველი პრეზიდენტი, ნურსულთან ნაზარბაევი გადადგა. მან ახალ პრეზიდენტად სენატის სპიკერის, ყასიმ-ჟომარტ ტოყაევის დანიშვნა შესთავაზა, რომელიც ქვეყანას 2020 წლის საპრეზიდენტო არჩევნებამდე უხელმძღვანელებს. სენატის სპიკერის პოსტი კი ნაზარბაევის უფროსმა შვილმა, დარიგა ნაზარბაევამ დაიკავა.

ტოყაევი უფლებამოსილების შესრულებას დღეს, 20 მარტს შეუდგა. პარლამენტში გამოსვლისას მან ითხოვა, რომ ასტანას სახელი შეცვლოდა. გარდა ამისა, მან განაცხადა, რომ ყველა ოლქის ცენტრალურ ქალაქში მთავარი ქუჩები ნაზარბაევის სახელობის უნდა იყოს. ამასთანავე, ტოყაევმა პარლამენტს შესთავაზა, რომ დედაქალაქში ყოფილი პრეზიდენტის მონუმენტი დაიდგას და ნაზარბაევს სახალხო გმირისა და საპატიო სენატორის სტატუსი მიენიჭოს.

ახალი პრეზიდენტის თქმით, ნაზარბაევის გამოსახულების პორტრეტები და ფოტოები დარჩება, როგორც "საზოგადოებრივი ადგილების, სახელმწიფო მოხელეების კაბინეტებში, შენობებისა და სასწავლო დაწესებულების განუყოფელი ატრიბუტი".

თვითონ ნაზარბაევი გადადგომის მიუხედავად ერის ლიდერის სტატუსს იტოვებს, ყაზახეთის უშიშროების საბჭოს უხელმძღვანელებს, კონსტიტუციური საბჭოს წევრი იქნება და მმართველი პარტიის ლიდერად დარჩება.