29-წლიანი მმართველობის შემდეგ ყაზახეთის პრეზიდენტი ნურსულთან ნაზარბაევი თანამდებობიდან თავისი ნებით გადადგა. ინფორმაციას ამის შესახებ რუსული გამოცემა RBK ავრცელებს. ნაზარბაევი ყაზახეთის პრეზიდენტს თანამდებობას 1990 წლიდან უწყვეტად იკავებდა.

"ამ წლების განმავლობაში ჩვენ ერთად ვმუშაობდით, თქვენ მე მხარს მიჭერდით ყველა არჩევნებზე, მე კი თქვენ სიმართლითა და რწმენით გემსახურებოდით. იყო ყაზახეთის პრეზიდენტი ეს არის ბედნიერება. მე გადავწყვიტე დავტოვო პრეზიდენტის პოსტი და მუშაობას გავაგრძელებ ქვეყნის უსაფრთხოების სამსახურის უფროსის თანამდებობაზე", — ამის შესახებ მან საზოგადოებისთვის ჩაწერილ სატელევიზიო მიმართვაში ისაუბრა.

ნაზარბაევმა შემცვლელად სენატის სპიკერი, კასიმ-ჟომარტ ტოკაევი დაასახელა. ტოკაევი პრეზიდენტის მოვალეობას მომავალ საპრეზიდენტო არჩევნებამდე დაიკავებს.

ნაზარბაევი იყო ბოლო საბჭოთა ლიდერი, რომელიც ამ დრომდე მართავდა სახელმწიფოს. 2007 წელს ქვეყნის პარლამენტმა ნაზარბაევის ნაციის ლიდერის (ელბასი) წოდება მიანიჭა და უფლება მისცა პრეზიდენტის პოსტზე განუსაზღვრელი რაოდენობით ეყარა კენჭი. ამ დრომდე ქვეყანაში არჩევნები უალტერნატივო საპრეზიდენტო კანდიდატის პირობებში ტარდებოდა. ბოლო საპრეზიდენტო არჩევნებზე ნაზარბაევმა ამომრჩევლების 98,7 პროცენტიანი მხარდაჭერა მიიღო. ნურსულთან ნაზარბაევის მიმდინარე საპრეზიდენტო ვადა 2020 წელს იწურებოდა.