ყაზახეთის ახალმა პრეზიდენტმა, ყასიმ-ჟომარტ ტოყაევმა განაცხადა, რომ ქვეყნის დედაქალაქ ასტანას ყოფილი პრეზიდენტის ნურსულთან ნაზარბაევის სახელი უნდა დაერქვას. ტოყაევი პრეზიდენტის მოვალეობის შესრულებას, დღეს 20 მარტს შეუდგა.

გარდა ამისა, მას მიაჩნია, რომ ყველა ოლქის ცენტრალურ ქალაქში მთავარი ქუჩები ნაზარბაევის სახელობის უნდა იყოს. ამასთანავე, ტოყაევმა პარლამენტს შესთავაზა, რომ დედაქალაქში ყოფილი პრეზიდენტის მონუმენტი დაიდგას და ნაზარბაევს სახალხო გმირისა და საპატიო სენატორის სტატუსი მიენიჭოს.

ახალი პრეზიდენტის თქმით, ნაზარბაევის გამოსახულების პორტრეტები და ფოტოები დარჩება, როგორც "საზოგადოებრივი ადგილების, სახელმწიფო მოხელეების კაბინეტებში, შენობებისა და სასწავლო დაწესებულების განუყოფელი ატრიბუტი".

გუშინ, 19 მარტს, თითქმის 30-წლიანი მმართველობის შემდეგ ყაზახეთის პირველი პრეზიდენტი, ნურსულთან ნაზარბაევი გადადგა. მან ახალ პრეზიდენტად სენატის სპიკერის, ყასიმ-ჟომარტ ტოყაევის დანიშვნა შესთავაზა, რომელიც ქვეყანას 2020 წლის საპრეზიდენტო არჩევნებამდე უხელმძღვანელებს.

თვითონ ნაზარბაევი გადადგომის მიუხედავად ერის ლიდერის სტატუსს იტოვებს, ყაზახეთის უშიშროების საბჭოს უხელმძღვანელებს, კონსტიტუციური საბჭოს წევრი იქნება და მმართველი პარტიის ლიდერად დარჩება.