კომპანია მჯ ალიანსის გენერალური დირექტორი, ზაზა იჩქიტიძე აცხადებს, რომ ორთაჭალაში მშენებლობაზე დაღუპულ მუშებს, შესაძლოა, დამცავი ღვედი არ ჰქონდათ შეკრული.

მისი თქმით, მუშებს ღვედი რომ ჰქონოდათ შეკრული, ის დაიჭერდა და მათი გადარჩენა შესაძლებელი იქნებოდა.

"ერთი შეხედვით, ვიზუალური შეხედვით ჩანს, რომ სამშენებლო კალათაზე იმყოფებოდა რამდენი მუშა, ისიც არ ვიცი ზუსტად, ქვემოთ იდგე რომელიმე თუ სამივე ზემოთ... მოხდა ბაგირის გაწყვეტა, რამ გაწყვიტა ბაგირი, არ ვიცით. სამუხრუჭე ბაგირმა, როგორც ჩანს არ დაიჭირა. რატომ მოხდა ეს, ამას ექსპერტიზა დაადგენს", — ამბობს კომპანიის დირექტორი.

გუშინ, 16 მარტს, ორთაჭალაში მშენებარე კორპუსიდან სამი მუშა გადმოვარდა, მათგან ერთი ადგილზე, მეორე კი საავადმყოფოში გარდაიცვალა. რაც შეეხება მესამე მუშას, ის ინგოროყვას კლინიკაშია გადაიყვანილი.

შინაგან საქმეთა სამინისტროში On.ge-ს უთხრეს, რომ მომხდარზე გამოძიება სისხლის სამართლის კოდექსის 240-ე მუხლით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.