მარნეულის ყოფილი მერი, თემურ აბაზოვი, რომელსაც ბრალი მოქალაქის მიმართ დამამცირებელ და არადამიანურად მოპყრობაში ედება ბრალი, ადგილობრივ საკრებულოს 32 ათასი ლარის მიღების თხოვნით მიმართა. ინფორმაციას ამის შესახებ რადიო მარნეული ავრეცელებს.

ეს ის თანხაა, რომელიც აბაზოვს შვიდი თვე ციხეში ყოფნის ნაცვლად მერის თანამდებობაზე მუშაობის შემთხვევაში უნდა მიეღო. რადიო მარნეულის ინფორმაციით, ყოფილი მერის მიმართვა საკრებულომ დღეს, 13 მარტს გამართულ სხდომაზე ცნობის სახით მიიღო მიიღო.

მარნეულის საკრებულოს თავმჯდომარე ამირან გიორგაძემ მას შემდეგ, რაც On.ge-ს კითხვა მოუსმინა, ასეთი პასუხი გასცა:

"არ ვიცი ვინ ხართ, ვერ გაგცემთ პასუხს. საჭესთან ვზივარ".

თემურ აბაზოვი არაადამიანური მოპყრობის ბრალდებით 2018 წლის 13 ივნისს დააკავეს, მას შემდეგ, რაც სტუდია მონიტორის საგამოძიებო მასალა გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა, ძალადობის მსხვერპლი გახდა.

"გავრცელდა ვიდეოები, სადაც ეს მოქალაქე ბოდიშს იხდის და სახეზე, სავარაუდოდ, შარდს ისვამს", — აღნიშნულია სტუდია მონიტორის მიერ გავრცელებულ მასალაში.

აბაზოვი 13 დეკემბერს აღკვეთის ღონისძიება პატიმრობა 10 000-ლარიანი გირაოთი შეეცვალა.