გიორგი რუხაძემ პაატა ბურჭულაძის პარტიიდან წასვლის შესახებ, 13 სექტემბერს, პირველი რადიოს რადიოკლუბში საგანგებო ბრიფინგზე განაცხადა. მისი თქმით, ბურჭულაძის პარტია პავლე კუბლაშვილისა და გიორგი მელაძის ხელით იმართება და ბიძინა ივანიშვილის ინტერესებს ემსახურება:

"მე ვტოვებ პაატა ბურჭულაძის პოლიტიკურ პარტიას, იმ მიზეზით, რომ ეს აღარ არის პაატა ბურჭულაძის მოძრაობა, ეს აღარ არის ის პოლიტიკური მოძრაობა, რომელიც ჩვენ ერთად ავაშენეთ, ეს აღარ არის მოძრაობა რომელსაც ახალი თაობა მოყავდა პოლიტიკაში, ეს აღარ არის მოძრაობა, რომელიც ქართული ოცნების თუ ნაცმოძრაობის ალტერნატივა იქნებოდა, ეს აღარ არის ის პოლიტიკური მოძრაობა, რომელის ლიდერიც არის პაატა ბურჭულაძე".

რუხაძე აღნიშნავს, რომ რომ პაატა ბურჭულაძე პარტიაში აღარაფერს წყვეტს და რომ მას არც საპარლამენტო სიის ფორმირებაში მიუღია მონაწილეობა

"ის უბრალოდ პროცესს გაერიდა და ვაშინგტონიდან წარადგინა პავლე კუბლაშვილის შედგენილი საპარლამენტო სია. პაატა ბურჭულაძემ დათმო პარტია, დათმო გუნდი, დათმო ის იდეა რასაც ჩვენ ერთად ვემსახურებოდით. დღეს სამწუხარო რეალობა არის ის, რომ ბურჭულაძის მოძრაობამ შეწყვიტა არსებობა. მოძრაობა სახელმწიფო ხალხისთვის უბრალოდ აღარ არსებობს".

გიორგი რუხაძე აცხადებს, რომ დღეს პაატა ბურჭულაძე არის უბრალო ფასადი, პოლიტიკური ბლოკისა, რომელიც ბარიერის გადალახვის შემთხვევაში ქართული ოცნების დამატება გახდება.

"ათეულში პაატა ბურჭულაძის გარდა მისი მოძრაობის მხოლოდ 2 სახეა. სია რომლის მე-8 ნომერი ბურჭულაძის მოძრაობის კვოტით გიორგი მელაძეა. ამის დასტურია ის ფაქტი, რომ გაერთიანების შემდეგ შეწყდა მოძრაობაზე სუს-ის ზეწოლა. მწვავე ფინანსური კრიზისის შემდეგ გაჩნდა თანხები, რომლებიც მრავალ მილიონიანი დავალიანების გასტუმრებას მოხმარდა, რომელიც ჯერ სრულად არ გასტუმრებულია. წინასაარჩევნო ბიუჯეტი ათობით მილიონ ლარით გაიწერა. ჰკითხეთ ბურჭულაძეს ვის შეიძლება ეკუთვნოდეს ან ვისი ხელდასმით შეიძლება ჰქონდეს გირჩსა და ახალ საქართველოს ეს თანხები, როდესაც მათი რეიტინგი 1 პროცენტს არ აღემატება? პასუხი ნათელია".