ეკონომიკისა და მდგრადი განვითარების მინისტრის, დიმიტრი ქუმსიშვილის განცხადებით, საქართველოსა და ჩინეთს შორის თავისუფალი ვაჭრობის შესახებ მოლაპარაკებები წარმატებით დასრულდა. თავისუფალი სავაჭრო ურთიერთობა ოფიციალურად 2017 წლის მეორე ნახევრიდან ამოქმედდება:

"ეს არის უპრეცედენტო შედეგი, რომელსაც ჩვენმა ქვეყანამ ჩინეთის სახალხო რესპუბლიკასთან მიაღწია. ჩვენ მოლაპარაკებები თავისუფალ ვაჭრობაზე დავასრულეთ 7 თვეში. ძალიან მნიშვნელოვანია ის შედეგები, რომლებიც აღნიშნული მოლაპარაკებიდან მივიღეთ. პირველ რიგში, მინდა აღვნიშვნო, რომ პრაქტიკულად ჩვენი პროდუქციის და მომსახურების 95%-ზე მეტი ჩინეთის ბაზარზე ყველანაირი დამატებითი გადასახადების გარეშე შევა".

ქუმსიშვილის განმარტებით, შეთანხმება ჩინეთში საბაჟო გადასახადების გარეშე ქართული ღვინის, მინერალური წყლებისა და სხვა აგროპროდუქციის შეტანა-რეალიზაციას გულისხმობს.

მისივე თქმით, ჩინეთის დელეგაცია საქართველოს ოქტომბერში ეწვევა იმისთვის, რომ მემორანდუმი გაფორმდეს. ასევე მომზადდება ხელშეკრულება, რომელსაც ორი ქვეყნის პარლამენტები გაუწევენ რატიფიცირებას.